वारजे भागात सोसायटीतील दुकानात आग

अग्निशमन दलाकडून अर्ध्या तासात आग आटोक्यात

marathinews24.com

पुणे – शहरातील वारजे भागातील एका सोसायटीत असलेल्या स्टेशनरी साहित्याच्या दुकानात मध्यरात्री मोठी आग लागली. अग्निशमन दलाकडून अर्ध्या तासात आग आटोक्यात आणली. सुदैवाने या घटनेत कोणी जखमी झाले नाही. सोसायटीतील दुकानात आग लागल्याने रहिवाशांमध्ये घबराट उडाली.

कात्रज घाटात एसटी-रिक्षाचा भीषण अपघात – सविस्तर बातमी

वारजे माळवाडी भागातील राहुल पार्क सोसायटीत मध्यरात्री सव्वाबाराच्या एका स्टेशनरी दुकानात आग लागल्याची माहिती अग्निशमन दलाला मिळाली. दुकानातील साहित्याने पेट घेतल्याने आग भडकली, तसेच मोठ्या प्रमाणावर धूर निर्माण झाल्याने रहिवासी घाबरले. आगीची झळ स्टेशनरी दुकानाच्या शेजारी असलेल्या गणेश भेळ या दुकानाला बसली. आगीच मााहिती मिळताच अग्निशमन दलाचे बंब, टँकर घटनास्थळी दाखल झाले. जवान रमेश भिलारे, धर्मराव माने, निलेश तागुंदे , सिद्धेश भगत, आशिष पांगसे, दत्तात्रय शेटे यांनी घटनास्थळी धाव घेऊन तातडीने आग आटोक्यात आणण्यासाठी प्रयत्न सुरू केले. जवानांनी पाण्याचा मारा करुन अर्ध्या तासात आग आटोक्यात आणली. दुकानात कोणी नसल्याची खात्री केली. आग पूर्णपणे आटोक्यात आल्यानंतर अग्निशमन दलाचे जवान रवाना झाले. आगीमागचे कारण समजू शकले नाही, अशी माहिती अग्निशमन दलाच्या मुख्य नियंत्रण कक्षाकडून देण्यात आली.