मुंढवा पोेलिसांची कारवाई
marathinews24.com
पुणे – अमली पदार्थ तस्करी प्रकरणात वेळोवेळी कारवाई केल्यानंतर वर्तणुकीत सुधारणा न झाल्याने अमली पदार्थ तस्कर (Mundhwa Drug Smuggler) महिलेविरुद्ध मुंढवा पोेलिसांनी ‘पीआयटी एनडीपीएस’ कायद्यातील तरतुदींच्या आधारे कठोर कारवाई केली. पोलीस आयुक्त अमितेशकुमार यांच्या आदेशाने अमली पदार्थ तस्कर महिलेला वर्षभरासाठी कोल्हापूरातील कळंब मध्यवर्ती कारागृहात स्थानबद्ध करण्यात आले आहे.
श्वान मालक महिलेच्या अंगावर मोटार घालून खुनाचा प्रयत्न – सविस्तर बातमी
रिना रवी गुमाने (वय ३२) असे कारवाई केलेल्या अमली पदार्थ तस्कर महिलेचे नाव आहे. मुंढवा पोलिसांनी अमली पदार्थ तस्करी आणि विक्री प्रकरणात रिना हिच्याविरुद्ध २०२२ मध्ये अमली पदार्थ प्रतिबंधक कायद्यान्वये (एनडीपीएस) गु्न्हा दाखल केला होता. या गुन्ह्यात तिने पुण्यातील सत्र न्यायालयाकडून ८ ऑगस्ट २०२२ रोजी जामीन मिळविला होता. जामीन मंजूर केल्यानंतर तिने पुन्हा अमली पदार्थ विक्री सुरू केली. मुंढवा पोलिसांनी गेल्या १९ मे रोजी रोजी गुन्हा दाखल केला. या गुन्ह्यात तिने अतिरिक्त सत्र न्यायालयाकडून जामीन मिळवला होता.
न्यायालयाने तिला अटी आणि शर्तींवर जामीन मंजूर केला होता. मात्र, रिना हिच्या वर्तणुकीत सुधारणा झाली नसल्याचे दिसून आले. ती पुन्हा अमली पदार्थ विक्री, तस्करीत (Mundhwa Drug Smuggler) सामील असल्याची माहिती मिळाली होती. त्यानंतर तिच्याविरुद्ध कठोर प्रतिबंधात्मक कारवाई करण्यासाठी पोलीस महासंचालक सदानंद दाते यांच्याकडे प्रस्ताव पाठविण्यात आला. रिनाला वर्षभरासाठी ‘पीआयटी -एनडीपीएस’ कायद्यान्वये कारागृहात स्थानबद्ध करावे, असा प्रस्ताव सादर करण्यात आला होता.
या प्रस्तावाला पोलीस महासंचालकांनी मंजुरी दिली. त्यानंतर पोलीस आयुक्तांच्या आदेशाने तिला कोल्हापूरातील कळंब कारागृहात वर्षभरासाठी स्थानबद्ध करण्यात आले. अतिरिक्त पोलीस आयुक्त मनोज पाटील, उपायुक्त जीवन बेनीवाल, सहायक आयुक्त अतुलकुमार नवगिरे यांच्या मार्गदर्शनाखाली वरिष्ठ पोलीस निरीक्षक स्मिता वासनीक, गुन्हे शाखेचे निरीक्षक सागर गोडे, सहायक निरीक्षक गणेश पिंगुवाले, उपनिरीक्षक युवराज पोमण, केतकी चव्हाण, प्रमोद काळे, संभाजी शितोळे, सचिन बोराटे, रुपेश तोडेकर, तेजस जगदाळे, रुपेश महामुनकर, सारिका पखाले, विशाल बनकर, ऋषीकेश टिळेकर, अक्षय जराड यांनी ही कारवाई केली.
