अपघातानंतर पसार झालेल्या वाहन चालकांविरुद्ध गुन्हा दाखल
marathinews24.com
पुणे – छत्रपती शिवाजी महाराज रस्त्यावर भरधाव वाहनाच्या धडकेत दुचाकीस्वार तरुणाचा मृत्यू झाल्याची घटना गुरुवारी पहाटे घडली. अपघातानंतर पसार झालेल्या वाहन चालकांविरुद्ध गुन्हा दाखल करण्यात आला. बळीराम साहेबराव चव्हाण (वय २१, रा. पांगरी, बदनापूर, जि. जालना) असे मृत्युमुखी पडलेल्या दुचाकीस्वाराचे नाव आहे. याबाबत राम साहेबराव चव्हाण (वय २३) यांनी खडक पाेलीस ठाण्यात फिर्याद दिली आहे.
पोलिसांनी दिलेल्या माहितीनुसार, दुचाकीस्वार बळीराम छत्रपती शिवाजी महाराज रस्त्यावरुन गुरुवारी (११ सप्टेंबर) पाहटे चारच्या सुमारास निघाला होता. खडकमाळ आळी परिसरातील राष्ट्रभूषण चौकात भरधाव मोटारीने दुचाकीस्वार बळीराम याला धडक दिली. अपघातानंतर वाहनचालक पसार झाला. गंभीर जखमी झालेल्या बळीरामचा मृत्यू झाला. या प्रकरणी चारचाकी वाहन चालकाविरुद्ध गुन्हा दाखल करण्यात आला आहे. पोलीस उपनिरीक्षक दाढे तपास करत आहेत.
सदनिकेचे कुलूप तोडून दागिने लांबविले
सदनिकेचे कुलूप तोडून चोरट्यांनी तीन लाख रुपयांचे सोन्याचे दागिने लांबविल्याची घटना चतु:शृंगी भागात घडली.
याबाबत एकाने चतु:शृंगी पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, चोरट्यांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार कोथरूड भागात राहायला आहेत. चतु:शृंगी परिसरातील एका सोसायटीत त्यांची सदनिका आहे. चोरट्यांनी सदनिकेचे कुलूप तोडले. कपाट उचकटून चाेरट्यांनी तीन लाख रुपयांचे सोन्याचे दागिने लांबविले. गुरुवारी (११ सप्टेंबर) सायंकाळी घरफोडी झाल्याचा प्रकार उघडकीस आला.
या घटनेची माहिती मिळताच वरिष्ठ पोलीस निरीक्षक उत्तम भजनावळे यांनी घटनास्थळी भेट दिली. पोलिसांनी सोसायटीच्या परिसरातील सीसीटीव्ही चित्रीकरण ताब्यात घेतले असून, सहायक पोलीस निरीक्षक अनिकेत पोटे तपास करत आहेत.
