गरजू रुग्णांना या शिबीराचा लाभ घेण्याचे आवाहन
marathinews24.com
पुणे – उपमुख्यमंत्री दिवंगत अजित पवार यांच्या जयंतीनिमित्त महाराष्ट्र राज्यातील सर्वसामान्य नागरिकांना दर्जेदार व मोफत आरोग्यसेवा उपलब्ध करून देण्याच्या उद्देशाने वैद्यकीय शिक्षण विभाग, महाराष्ट्र शासन यांच्या अधिनस्त राज्यातील शासकीय वैद्यकीय महाविद्यालये व संलग्नित रुग्णालयांमार्फत दि. १६ जुलै ते २५ जुलै २०२६ या कालावधीत “आरोग्य तपासणी व विशेष आरोग्य शिबिर अभियान” आयोजन करण्यात येणार आहे. या पार्श्वभुमीवर पुण्यश्लोक अहिल्यादेवी होळकर शासकीय वैद्यकीय महाविद्यालय व रुग्णालय, बारामती यांच्यावतीने १६ जुलै ते २५ जुलै २०२६ पर्यंत तालुक्यातील विविध ठिकाणी विशेष मोफत आरोग्य तपासणी शिबिराचे आयोजन करण्यात आले आहे.
या शिबीरामध्ये विशेषतः रक्तदान शिबीर, नेत्र तपासणी व मोतीबिंदू शस्रक्रिया, गर्भाशय व मुख कर्करोग तपासणी, स्तन कर्करोग तपासणी, दुर्बिणीद्वारे (लॅप्रोस्कॉपीक) हर्निया शस्रकिया व स्थुलता तपासणी आदी आरोग्य विषयक शिबिरांचा समावेश आहे. तसेच तज्ज्ञ डॉक्टरांमार्फत सर्वसाधारण आरोग्य तपासणी, स्त्रीरोग व प्रसूती, नेत्ररोग, शल्यचिकित्सा, औषधोपचार, मधुमेह व उच्च रक्तदाब तपासणी, हृदयरोग सल्ला तसेच आवश्यकतेनुसार पुढील उपचारासाठी मार्गदर्शन करण्यात येणार आहे. याशिवाय रक्तदान व विविध आरोग्यविषयक योजनांची माहिती तसेच आवश्यक तपासण्यांची सुविधाही उपलब्ध करून देण्यात येणार आहे.
बारामती शहर तसेच ग्रामीण भागातील गरजू रुग्णांनी विशेष आरोग्य शिबीरात सहभागी होऊन त्याचा लाभ घ्यावा असे आवाहन पुण्यश्लोक अहिल्यादेवी होळकर शासकीय वैद्यकीय महाविद्यालयाच्या अधिष्ठाता डॉ. अंजली पाटील आणि वैद्यकीय अधिक्षक डॉ. राजेश उमप यांनी केले आहे.
