गुन्हे शाखेची कारवाई
marathinews24.com
पुणे – शहरात बंदी असलेल्या ई-सिगारेट (वेप) आणि तंबाखूजन्य हुक्का फ्लेवरची अवैध विक्री करणाऱ्यांवर पुणे गुन्हे शाखेच्या अमली पदार्थ विरोधी पथक दोनने कारवाई केली आहे. याप्रकरणी तिघांना अटक केली आहे. शहरातील वेगवेगळ्या ठिकाणी एकाचवेळी छापे टाकून ८ लाख ३३ हजारांचा मुद्देमाल जप्त केला आहे. तीन दुकानदारांवर खटले दाखल करण्यात आले आहे.
हुसैन अब्दुल रहमान (वय २५, रा. कोरेगाव पार्क, पुणे) हसन शेख (वय ४२, रा. एमजी रोड कॅम्प) आणि अब्दुल इस्माईल जाबीर (वय २८, मोलेदिना रोड, कॅम्प) यांना ताब्यात घेण्यात आले आहे. पुढील तपास संबंधित पोलीस ठाण्यांकडे वर्ग करण्यात आला आहे.इलेक्ट्रॉनिक सिगारेट उत्पादन, आयात-निर्यात, साठवणूक व जाहिरात प्रतिबंध अधिनियम २०१९ अंतर्गत संबंधित आरोपींवर गुन्हे दाखल केला आहे. यावेळी २९७ ई सिगारेट, ८९५ तंबाखुजन्य हुक्का फ्लेवर जप्त केले. ही कारवाई अपर पोलीस आयुक्त पंकज देशमुख, पोलीस उपायुक्त निखील पिंगळे यांच्या मार्गदर्शनाखाली पोलीस निरीक्षक सुदर्शन गायकवाड, उपनिरीक्षक अस्मिता लाड राजस शेख, संदिप जाधव, पृथ्वीराज पांडुळे, दिनेश बास्टेवाड, यांच्या पथकाने केली.
