चोरट्यांविरुद्ध पोलिसांनी केला गुन्हा दाखल
marathinews24.com
पुणे – शहरातील मध्यवर्ती तुळशीबागेत महिलांच्या पिशवीतून दागिने आणि रोकड चोरीला जाण्याच्या घटनांमध्ये वाढ झाली असून, तुळशीबागेत चोरट्यांचा सुळसुळाट झाला आहे. तुळशीबागेत खरेदीसाठी आलेल्या एका महिलेच्या पिशवीतून रोकड आणि मंगळसूत्र असा ७९ हजार रुपयांचा ऐवज लांबविण्याची घटना नुकतीच घडली. याप्रकरणी चोरट्यांविरुद्ध पोलिसांनी गुन्हा दाखल केला. याबाबत महिलेने विश्रामबाग पोलीस ठाण्यात फिर्याद दिली आहे.
कोंढव्यात घरपोडी; सहा लाखांचा ऐवज चोरीला – सविस्तर बातमी
पोलिसांनी दिलेल्या माहितीनुसार, तक्रारदार ५६ वर्षीय महिला मूळच्या अहिल्यानगरमधील भिंगार परिसरात राहायला आहेत. त्या रविवारी (२३ नाेव्हेंबर) नातेवाईकांसह दुपारी साडेतीनच्या सुमारास खरेदीसाठी आल्या होत्या. शनिपार चौकातून त्या तुळशीबागेत खरेदीसाठी निघाल्या होत्या. तुळशी बागेतील एका पर्सच्या दुकानाजवळ गर्दी होती. गर्दीत चोरट्यांनी महिलेच्या पिशवीतून पाच हजारांची रोकड आणि सोन्याचे दागिने असा ७९ हजार रुपयांचा ऐवज लांबविला. ऐवज चोरीला गेल्याचे काही वेळानंतर लक्षात आले. त्यानंतर महिलेने पोलीस ठाण्यात धाव घेऊन तक्रार दिली. पोलीस कर्मचारी मोरे तपास करत आहेत.
काही महिन्यांपासून तुळशीबागेत खरेदीसाठी आलेल्या महिलांच्या पिशवीतून दागिने, रोकड चोरीला जाण्याच्या घटनांमध्ये वाढ झाली आहे. अशा प्रकारचे पाच ते सहा गुन्हे विश्रामबाग पोलीस ठाण्यात दाखल झाले आहेत. मध्यंतरी खरेदीसाठी आलेल्या महिलेच्या पिशवीतून दागिने चाेरणाऱ्या महिलेसह तिच्याबरोबर असलेल्या अल्पवयीन मुलीला पोलिसांनी अटक केली होती. तुळशीबागेतील गैरप्रकार, तसेच चोरीच्या घटना रोखण्यासाठी तीन वर्षांपूर्वी सीसीटीव्ही कॅमेरे लावण्यात आले होते. तुळशीबागेत महिलांकडील दागिने चोरीच्या घटना वाढल्यानंतर पोलिसांनी गस्त वाढवावी अशी मागणी तुळशीबागेतील व्यापाऱ्यांनी केली आहे.
