विश्रांतवाडीतील घटना
marathinews24.com
पुणे – मोटारीची काच फोडून चोरट्यांनी लॅपटाॅप, पाच लाखांचे जमीन मोजणीचे यंत्र, सोन्याची अंगठी असा मुद्देमाल लांबविल्याची घटना आळंदी रस्त्यावरील विश्रांतवाडी चौकात घडली. याबाबत एकाने विश्रांतवाडी पोलीस ठाण्यात फिर्याद दिली आहे. त्यांनी दिलेल्या फिर्यादीनुसार चोरट्यांविरुद्ध गुन्हा दाखल करण्यात आला आहे.
सायबर चोरांकडून चौघांची ८२ लाख ३५ हजारांची फसवणूक – सविस्तर बातमी
पोलिसांनी दिलेल्या माहितीनुसार, तक्रारदार आळंदी रस्त्यावरील डुडुळगावात राहायला आहेत. ते १४ जुलै रोजी रात्री मोटारीतून घरी निघाले होते. त्यांचा जमीन मोजणीचा व्यवसाय आहे. रात्री साडेअकराच्या सुमारास त्यांनी विश्रांतवाडी चौकात मोटार लावली होती. चोरट्यांनी मोटारीची काच फोडून जमीन मोजणीचे यंत्र (रोव्हर मशिन), लॅपटाॅप, सोन्याची अंगठी असा मुद्देमाल लांबविला. पोलीस उपनिरीक्षक माने तपास करत आहेत.
क्रेडीट कार्डवरुन ८ लाखांचे कर्ज
लोहगाव भागातील एका तरुणाची सायबर चोरट्यांनी ७ लाख ९९ हजार रुपयांची फसवणूक केली. सायबर चोरट्यांनी एका बँकेतून बोलत असल्याची बतावणी करुन तरुण वापरात असलेल्या क्रेडीट कार्डची माहिती घेतली. तरुणाने बँकेच्या तपशीलासह क्रेडीट कार्डचा सांकेतिक शब्द चोरट्यांना दिला. चोरट्यांनी माहितीचा गैरवापर करुन तरुणाच्या क्रेडीट कार्डवरुन ७ लाख ९९ हजार रुपयांचे कर्ज काढले. याबाबत तरुणाने विमानतळ पोलीस ठाण्यात फिर्याद दिली आहे. वरिष्ठ पोलीस निरीक्षक शेळके तपास करत आहेत.
