हडपसर भागात घडला होता अपघात
marathinews24.com
पुणे – दुचाकीस्वार डाॅक्टर तरुणाला धडक देऊन पसार झालेल्या टँकरचालकाला पोलिसांनी अटक केली. हडपसर भागात साेमवारी ही घटना घडली होती. पसार झालेल्या टँकरचालकाचा माग काढून पोलिसांनी त्याला ताब्यात घेतले.
राजेंद्र एकनाथ तळेकर (वय ५१, रा. विंग, ता. खंडाळा, जि. सातारा) असे अटक करण्यात आलेल्याचे नाव आहे. डाॅ. ईश्वर साहू (वय २९, रा. सातववाडी, हडपसर) असे मृत्युमुखी पडलेल्याचे नाव आहे. डाॅ. साहू हे मूळचे छत्तीसगडचे रहिवासी आहेत. ते हडपसर भागातील प्रजापिता ब्रह्मकुमारी संस्थेत प्रशिक्षण घेत होते.
अल्पवयीन मुलीची नको ते फोटो-व्हिडिओ केले व्हायरल – सविस्तर बातमी
डॉ साहू हे हडपसर-सातववाडी रस्त्याने दुचाकीवरुन सोमवारी (२१ एप्रिल) निघाले होते. त्यावेळी पीएमपी थांब्यासमोर दुचाकीस्वार डाॅ. साहू यांना भरधाव टँकरने धडक दिली. अपघातानंतर टँकरचालक पसार झाला. गंभीर जखमी झालेल्या डाॅ. साहू यांचा उपचारांपूर्वीच मृत्यू झाला होता. पसार झालेल्या टँकरचालकाविरुद्ध गुन्हा दाखल करण्यात आल्यानंतर पोलिसांनी तपास सुरू केला.
वरिष्ठ पोलीस निरीक्षक संजय मोगले, पोलीस निरीक्षक नीलेश जगदाळे यांच्या मार्गदर्शनाखाली उपनिरीक्षक हसन मुलाणी, सत्यवान गेंड, पोलीस कर्मचारी तुकाराम झुंजार, चंद्रकांत रेजीतवाड यांनी पसार झालेल्या टँकर चालकाचा शोध घेण्यास सुरुवात केली. पोलिसांनी हडपसर-सासवड रस्त्यावरील सीसीटीव्ही चित्रीकरण मिळवले. चित्रीकरणाद्वारे पोलिसांनी माग काढून पोलिसांनी टँकरचालक तळेकरला ताब्यात घेतले. सहायक पोलीस निरीक्षक हसीना शिकलगार तपास करत आहेत.
