फरासखाना पोलिसांची कारवाई
marathinews24.com
पुणे – शहरात वाहन चोरीच्या घटना घडत असताना फरासखाना पोलिसांनी वाहनचोरीच्या गुन्ह्यांचा छडा लावला आहे. सराईत वाहन चोराला अटक करून चार गुन्ह्यांची उकल केली आहे. आरोपीकडून चार मोटारसायकली जप्त करण्यात आल्या असून, या कारवाईमुळे फरासखाना पोलिसांना मोठे यश मिळाले आहे. रामेश्वर दशरथ बोडखे (वय ३२, रा. नवीन बिल्डिंग, ग्रीन पॅलेस हॉटेलजवळ, बुधवार पेठ, पुणे) असे अटक करण्यात आलेल्या आरोपीचे नाव आहे.
आरोपींविरुद्ध पुरावे गोळा करण्यासाठी सखोत तपास-पोलीस अधीक्षक – सविस्तर बातमी
फरासखाना पोलिस ठाण्याचे वरिष्ठ पोलिस निरीक्षक संदीप देशमाने यांच्या मार्गदर्शनाखाली वाहनचोरीच्या गुन्ह्यांचा तपास सुरू होता. याच दरम्यान पोलिस अंमलदार गजानन सोनुने आणि चेतन होळकर यांना मिळालेल्या गोपनीय माहितीनुसार संशयित रामेश्वर बोडखे याला ताब्यात घेण्यात आले. चौकशीदरम्यान त्याच्याकडे वाहनचोरीबाबत सखोल विचारपूस करण्यात आली.
तपासात आरोपीने फरासखाना पोलिस ठाण्याच्या हद्दीतून चार मोटारसायकली चोरल्याची कबुली दिली. त्यानंतर पोलिसांनी त्याला अटक करून त्याने विविध ठिकाणी लपवून ठेवलेल्या चार दुचाकी हस्तगत केल्या. या कारवाईमुळे फरासखाना पोलिस ठाण्यात दाखल असलेले वाहनचोरीचे चार गुन्हे उघडकीस आले आहेत. आरोपीकडून आणखी काही गुन्ह्यांची उकल होण्याची शक्यता असून, पोलिस त्यादृष्टीने तपास करत आहेत. पोलिस निरीक्षक राजेश महाला, उपनिरीक्षक राजेंद्र पाटोळे, प्रणिल चौगुले तसेच पोलिस अमंलदार कृष्णा निढाळकर, नितीन तेलंगे, महेश पवार, नितीन जाधव यांच्या पथकाने ही कारवाई केली.
