अतिरिक्त मुख्य न्यायदंडाधिकारी आठवे यांनी दिला महत्त्वपूर्ण निकाल
marathinews24.com
बीड (अनंत जाधव) – चेक (धनादेश) बाउन्स झाल्याप्रकारणी महिलेला शिक्षा सुनावली आहे. हातउसने घेतलेले पैसे परत न केल्यामुळे आरोपी महिलेला १० लाख रुपये दंड आणि ६ महिने कारावासाची शिक्षा सुनावली आहे. दोन्ही बाजूंचा युक्तिवाद ऐकून घेतल्यानंतर हा निकाल दिला आहे. बीड येथील अतिरिक्त मुख्य न्यायदंडाधिकारी आठवे यांनी महत्त्वपूर्ण निकाल दिला आहे.
हडपसरमधील सराफी पेढीवर भरदिवसा दरोडा – सविस्तर बातमी
फिर्यादी सुनील मुरलीधर जगताप आणि आरोपी पंचफुला मधुकर जगताप यांच्यात आर्थिक व्यवहार झाला होता. १२ ऑगस्ट २०२१ रोजी आरोपी पंचफुला जगताप यांनी फिर्यादीकडून १० लाख रुपये हातउसने घेतले होते. ही रक्कम परत करण्यासाठी आरोपीने सुनील जगताप यांना युनियन बँक ऑफ इंडियाचा १० लाख रुपयांचा धनादेश दिला होता. हा धनादेश बँकेत वटला जाईल आणि तुमचे पैसे मिळतील, असा विश्वासही आरोपीने दिला होता. जगताप यांनी धनादेश बँकेत जमा केला असता, आरोपीच्या खात्यावर पुरेशी रक्कम शिल्लक नाही या कारणास्तव तो बाउन्स झाला. फसवणूक झाल्याचे लक्षात येताच सुनील जगताप यांनी बीड येथील अतिरिक्त मुख्य न्यायदंडाधिकारी यांच्या न्यायालयात ‘सुनील विरुद्ध पंचफुला’ समरी क्रिमिनल केस क्र. १८४३/२३) अन्वये दाद मागितली.
दोन्ही बाजूंचा युक्तीवाद आणि पुराव्यांची शहानिशा केली. न्यायालयाने हा निष्कर्ष काढला की आरोपीने निगोशिएबल इन्स्ट्रुमेंट क्टच्या कलम १३८ नुसार गुन्हा केला आहे. या गुन्ह्याची गांभीर्याने दखल घेत न्यायालयाने आरोपी पंचफुला जगताप यांना १० लाख रुपये आणि ६ महिने कारावासाची शिक्षा दिली. फिर्यादी सुनील जगताप यांच्यावतीने वकील शशिकांत सावंत यांनी बाजू मांडली. त्यांना या प्रकरणात वकील विशाल विलासराव कदम, वकील अभिषेक बहिर, वकील माऊली डाके, वकील राजकुमार धरणे, वकील मुकुंद लोणकर, वकील प्रदीप दराडे, वकील विजय डोके, वकील अमोल तिडके आणि वकील प्रतीक गव्हाणे यांनी सहकार्य केले.
