पुण्यातील नवी पेठेत महिलेचे मंगळसूत्र हिसकावले

चोरट्याविरुद्ध गुन्हा दाखल

marathinews24.com

पुणे – पादचारी महिलेच्या गळ्यातील मंगळसूत्र चोरट्याने हिसकावून नेल्याची घटना नवी पेठेतील राजेंद्रनगर परिसरात घडली. याबाबत एका महिलेने विश्रामबाग पोलीस ठाण्यात फिर्याद दिली आहे. त्यांनी दिलेल्या फिर्यादीनुसार चोरट्याविरुद्ध गुन्हा दाखल करण्यात आला आहे.

वेश्या व्यवसायाचा पर्दाफाश, दोघांविरूद्ध कारवाई – सविस्तर बातमी

पोलिसांनी दिलेल्या माहितीनुसार, तक्रारदार ५७ वर्षीय महिला राजेंद्रनगर परिसरात राहायला आहेत. मंगळवारी (१६ जून) सायंकाळी साडेसातच्या सुमारास तक्रादार महिला राजेंद्रनगर परिसरातील सोनाली मटण शाॅपसमोरील गल्लीतून निघाल्या होत्या. त्या वेळी चोरट्याने महिलेच्या गळ्यातील ५० हजार रुपयांचे मंगळसूत्र हिसकावून नेले. महिलेने आरडाओरडा केला. चोरटा गल्लीतून पसार झाला. या घटनेची माहिती मिळताच पोलिसांनी घटनास्थळी भेट दिली. पोलिसांनी सीसीटीव्ही चित्रीकरण तपासले असून, पसार झालेल्या चोरट्याचा शोध घेण्यात येत आहे. चोरट्याचे वय अंदाजे २० ते २५ वर्ष असून, सहायक पोलीस निरीक्षक उमेश कारके तपास करत आहेत. शहरात गेल्या काही महिन्यांपासून महिलांच्या गळ्यातील दागिने हिसकावण्याच्या घटनांमध्ये वाढ झाली आहे.

शाळेतून लॅपटाॅप, मोबाइल चाेरीला

बिबवेवाडी भागातील एका शाळेच्या कार्यालयाचे कुलूप तोडून चोरट्यांनी लॅपटाॅप आणि मोबाइल असा मुद्देमाल चोरुन नेण्यात आल्याची घटना उघडकीस आली. याबाबत एकाने बिबवेवाडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, बिबवेवाडीत नोबल इंग्लिश प्रायमरी स्कूल आहे. चोरट्यांनी शाळेच्या आवारातील कार्यालयाचे कुलूप तोडून लॅपटाॅप, मोबाइल असा ३४ हजार रुपयांचा मुद्देमाल चोरुन नेला. पोलीस हवालदार जाधव तपास करत आहेत.