दुर्धटनेस जबाबदार ठरल्याप्रकरणी ठेकेदाराविरुद्ध गुन्हा
marathinews24.com
पुणे – रंगकाम करताना तोल जाऊन पडल्याने कामगाराचा मृत्यू झाल्याची घटना तळजाई परिसरात घडली. दुर्घटनेस जबाबदार ठरल्या प्रकरणी ठेकेदारांविरुद्ध गुन्हा दाखल करण्यात आला आहे. अशोक दशरथ डेंगळे (वय ४९, रा. टिळेकनगर, कात्रज-कोंढवा रस्ता) असे मृत्यूमुखी पडलेल्या कामगाराचे नाव आहे. याबाबत डेंगळे यांचा मुलगा अमर (वय २३) याने सहकारनगर पोलीस ठाण्यात फिर्याद दिली आहे. त्याने दिलेल्या फिर्यादीनुसार ठेकेदारांविरुद्ध गुन्हा दाखल करण्यात आला आहे.
पती, मुलाला जिवे मारण्याची धमकी देऊन महिलेवर बलात्कार – सविस्तर बातमी
पोलिसांनी दिलेल्या माहितीनुसार, अशोक डेंगळे हे शुक्रवारी (३० जानेवारी) दुपारी साडेबाराच्या सुमारास तळजाई परिसरातील गायत्री सोसायटीत रंगकाम करत होते. तेथे लाकडी पाळण्याचा वापर करुन ते इमारतीला रंग लावत होते. त्या वेळी अशोक यांचा तोल गेला. तोल जाऊन पडल्याने ते गंभीर जखमी झाले. त्यांना तातडीने रुग्णालयात दाखल करण्यात आले. उपचारांपूर्वीच त्यांचा मृत्यू झाला होता. पोलिसांनी घटनास्थळी भेट दिली.
ठेकेदाराने सुरक्षाविषयक साधने न पुरविल्याने दुर्घटना घडल्याचे डेंगळे यांचा मुलगा अमर याने फिर्यादीत म्हटले आहे. त्याने दिलेल्या फिर्यादीनुसार गुन्हा दाखल करण्यात आला असून, गुन्हे शाखेच्या पोलीस निरीक्षक सोनाली मिठारे तपास करत आहेत.
