सायबर चोरट्याकडून जेष्ठाची फसवणूक
marathinews24.com
पुणे – शेअर ट्रेडींगमध्ये गुंतवणूक केल्यास चांगला परतावा मिळवून देतो, अशी बतावणी करीत सायबर चोरट्यांनी जेष्ठ नागरिकाला तब्बल ३३ लाख १९ हजारांचा ऑनलाईन गंडा घातला आहे. ही घटना १५ जुलै ते २२ ऑगस्ट कालावधीत माणिकबागेत घडली आहे. याप्रकरणी ६४ वर्षीय जेष्ठाने सिंहगड रस्ता पोलीस ठाण्यात तक्रार दाखल केली आहे. त्यानुसार मोबाइलधारक आरोपीविरूद्ध गुन्हा दाखल करण्यात आला आहे.
वडगाव बुद्रूकमध्ये घरफोडी, पावणेदोन लाखांचे दागिने चोरीला – सविस्तर बातमी
पोलिसांनी दिलेल्या माहितीनुसार, तक्रारदार जेष्ठ नागरिक सिंहगड रस्ता परिसरातील माणिकबागेत राहायला आहेत. १५ जुलैला सायबर चोरट्यांनी त्यांना संपर्क साधून शेअर ट्रेडींगमध्ये गुंतवणूकीचे आमिष दाखवले. सायबर चोरट्यांनी तक्रारदार जेष्ठाचा विश्वास संपादित केला. त्यानंतर त्यांना गुंतवणूक करण्यास भाग पाडले. तब्बल ३३ लाख १९ हजारांची गुंतवूणक केल्यानंतरही त्यांना परतावा मिळाला नाही. फसवणूक झाल्याचे लक्षात आल्यानंतर जेष्ठाने पोलीस ठाण्यात धाव घेत तक्रार दाखल केली आहे. पोलीस निरीक्षक उल्हास कदम तपास करीत आहेत.
मनी लॉड्रींगसह अतिरेक्यांना पैसे पाठविल्याची बतावणी
दहशतवाद विरोधी पथकाकडून बोलत असल्याची बतावणी करीत सायबर चोरट्यांनी औंधमधील तरूणाला १४ लाख ८ हजारांचा ऑनलाईन गंडा घातला आहे. ही घटना १ ते ३ ऑक्टोबर कालावधीत औंधमध्ये घडली असून, याप्रकरणी चतुःशृंगी पोलीस ठाण्यात गुन्हा दाखल करण्यात आला आहे. सायबर चोरट्यांनी तक्रारदार तरूणाच्या बँक खात्यातून मनी लॉड्रींगसह अतिरेक्यांना पैसे पाठविल्याचे पुरावे असल्याचे सांगितले. त्यांच्या बँक खात्यातील रक्कम तपासण्यासाठी पैसे वर्ग करण्यास भाग पाडले. मात्र, १४ लाखांवर रक्कम पाठवल्यानंतर तक्रारदाराला फसवणूक झाल्याचे लक्षात आले. त्यानंतर त्यांनी चतुःशृंगी पोलीस ठाण्यात धाव घेत तक्रार दाखल केली. पोलीस निरीक्षक ननवरे तपास करीत आहेत.
