चार महिने तो पोलिसांना गुंगारा देत होता आरोपी
marathinews24.com
पुणे – महाराष्ट्र संघटित गुन्हेगारी नियंत्रण कायद्यान्वये (मकोका) कारवाई केल्यानंतर गेले चार महिने पोलिसांना गुंगारा देणाऱ्या सराइताला गुन्हे शाखेने छत्रपती संभाजीनगर परिसरातून अटक केली. अजय उर्फ भज्या प्रकाश निकाळजे (वय ३२, सध्या रा. काकडे वस्ती, कोंढवा, मूळ रा. सिल्लोड, जि. छत्रपती संभाजीनगर) असे अटक करण्यात आलेल्याचे नाव आहे. निकाळजे याच्याविरुद्ध खुनाचा प्रयत्न, दहशत माजविणे, लूटमार, वाहन चोरी असे गंभीर स्वरुपाचे १२ गु्न्हे दाखल आहेत. यापूर्वी त्याच्याविरुद्ध झोपडपट्टी दादा प्रतिबंधक कायद्यान्वये् (एमपीडीए) कारवाई करुन वर्षभरासाठी कारागृहात स्थानबद्ध करण्यात आले होते.
कौटुंबिक छळ अन जादूटोण्यामुळे व्यावसायिकाची आत्महत्या – सविस्तर बातमी
कोंढवा परिसरात एकावर त्याने पिस्तुलातून गोळीबार केला होता. या प्रकरणी निकाळजेसह साथीदारांविरुद्ध महाराष्ट्र संघटित गुन्हेगारी नियंत्रण कायद्यान्वये कारवाई करण्यात आली होती. मकोका कारवाई केल्यानंतर तो पसार झाला होता. गेले चार महिने तो पोलिसांना गुंगारा देत होता. तो छत्रपती संभाजीनगर परिसरात असल्याची माहिती पोलीस कर्मचारी शशिकांत नाळे आणि राहुल ढमढेरे यांना मिळाली.
त्यानंतर पोलिसांच्या पथकाने छत्रपती संभाजीनगर परिसरात सापळा लावून अटक केली. गुन्हे शाखेच्या युनिट पाचचे पोलीस निरीक्षक संदीपान पवार, उपनिरीक्षक अभिजित पवार, विनाेद शिवले, शहाजी काळे, प्रताप गायकवाड, उमाकांत स्वामी, अमर चव्हाण, अकबर शेख, अविनाश इंगळे, सुधीर साेनवणे, नैत्रिका अडसूळ, मयुरी पालवे यांनी ही कारवाई केली.
