कोरेगाव पार्क पोलीस ठाण्यात गुन्हा दाखल
marathinews24.com
पुणे – गुंतवणुकीच्या आमिषाने निवृत्त लष्करी अधिकाऱ्यासह चार ते पाच जणांची १० कोटी ४६ लाख रुपयांची फसवणूक केली. याप्रकरणी कोरेगाव पार्क पोलीस ठाण्यात गुन्हा दाखल करण्यात आला आहे. मनिष केदारनाथ सुरवसे (वय ४८, रा. बी. टी. कवडे रस्ता) यांनी कोरेगाव पार्क पोलीस ठाण्यात फिर्याद दिली आहे. प्रफुल्ल जैन उर्फ प्रमोद प्रकाश माहेश्वरी, सोनिया माहेश्वरी, गौरव उर्फ गर्वित प्रमोद माहेश्वरी, हर्ष माहेश्वरी (सर्व रा. नेलर रस्ता), देवीसिंग पुरोहित , संकेत मुतगेकर (दोघेही रा. धानोरी), सोनिया उर्फ कशिश जोधानी, पंकज पवार यांच्याविरुद्ध गुन्हा दाखल केला आहे.
कर्जबाजारी झाल्याने रुग्णालयातील कर्मचाऱ्याकडून घरफोडी – सविस्तर बातमी
पोलिसांनी दिलेल्या माहितीनुसार, सुरवसे हे निवृत्त लष्करी अधिकारी आहेत. नातेवाईकाच्या मदतीने त्यांची आरोपींशी सप्टेंबर २०२४ मध्ये ओळख झाली होती. आरोपींनी सुरवसे यांच्यासह मित्रांना गुंतवणुकीवर ३० टक्के परतावा देण्याचे आमिष दाखविले. त्यांचा विश्वास संपादन करून ‘लर्नोवेशन इंडिया’ या ट्रेडिंग एज्युकेशन फर्ममध्ये तीन कोटी २५ लाख २८ हजार रुपयांची गुंतवणूक करण्यास भाग पाडले. सुरवसे यांच्यासह त्यांच्या मित्रांना जादा परताव्याचे आमिष दाखवून आरोपींनी त्यांना गुंतवणूक करण्यास भाग पाडले. आरोपींनी आतापर्यंत चार ते पाच णांची १० कोटी ४६ लाख ६३ हजार रुपयांची फसवणूक केली. वरिष्ठ पोलीस निरीक्षक सुनिल थोपटे तपास करत आहेत.
गुन्ह्यातील मुख्य आरोपी प्रफुल्ल जैन उर्फ प्रमोद प्रकाश माहेश्वरी हा फरार आहे. प्राथमिक चौकशीत आतापर्यंत चार ते पाच जणांची फसवणूक करण्यात आल्याचे उघडकीस आले आहे. फसवणुकीची व्याप्ती वाढण्याची शक्यता आहे, अशी माहिती वरिष्ठ पोलीस निरीक्षक सुनील थोपटे यांनी दिली.
