वाहतूक पोलिसाला धक्काबुक्की, ब्रेथ अॅनालायझरची केली तोडफोड
marathinews24.com
पुणे – शहरात ड्रंक अँड ड्राईव्ह तपासणी मोहिमेला विरोध करीत हवाई दलातील शिपायाने वाहतूक पोलिसांना धक्काबुक्की केली. त्यानंतर ब्रेथ अॅनालायझरची तोडफोड केल्याची घटना ३ जानेवारी रात्रीच्या सुमारास विमाननगर भागात घडली. शासकीय कामात अडथळा आणणे, धक्काबुकी केल्याप्रकरणी विमानतळ पोलिसांनी हवाई दलातील शिपायाविरुद्ध गुन्हा दाखल केला आहे. पोलीस हवालदार आनंद गोसावी यांनी विमानतळ पोलीस ठाण्यात फिर्याद दिली आहे.
पत्नी फेसबुक लाईव्ह करत असताना पतीचा जीव गेला – सविस्तर बातमी
मद्यपी वाहन चालकांकडून होणारे गंभीर अपघात रोखण्यासाठी वाहतूक विभागाकडून दंडात्मक कारवाईचा बडगा उगारण्यात आला आहे. त्यानुसार वाहतूक पोलिसांनी ३ जानेवारीला रात्री साडे अकराच्या सुमारास विमाननगर परिसरात नाकाबंदी करीत तपासणीला गती दिली होती. त्यावेळी हवाई दलातील शिपाई पदावर कार्यरत असलेला दुचाकीवरुन जात होता. तो हवाई दलाच्या वसाहतीत राहायला आहे. वाहतूक शाखेतील हवालदार गोसावी यांनी नाकाबंदीत वाहन अडवून तपासणी सुरू केली. तेव्हा शिपायाने गोसावी यांना धक्काबुक्की केली.
ब्रीथ अॅनालायजर यंत्र हिसकावून घेत तोडफोड केली. त्यावेळी नाकाबंदीतील पोलिसांनी शिपायाला ताब्यात घेतले. माहिती मिळताच विमाननगर पोलीस ठाण्याचे वरिष्ठ पोलीस निरीक्षक गोविंद जाधव यांनी घटनास्थळी भेट दिली. सहायक पोलीस निरीक्षक शिरसाठ तपास करत आहेत. याप्रकरणी हवाई दलातील शिपायाविरुद्ध गुन्हा दाखल करुन नोटीस बजावली आहे.
