अलंकार पोलिसांनी केला गुन्हा दाखल
marathinews24.com
पुणे – ज्येष्ठ महिलेच्या सदनिकेतून दोन लाख रुपयांच्या बांगड्या चोरून नेल्याचा प्रकार एरंडवणे भागात उघडकीस आला. याप्रकरणी चोरट्याविरुद्ध अलंकार पोलिसांनी गुन्हा दाखल केला. ज्येष्ठ महिलेने अलंकार पोलीस ठाण्यात फिर्याद दिली आहे.
नेपाळी रखवालदाराच्या घरातून ३ लाखांचे दागिने लांबविले – सविस्तर बातमी
पोलिसांनी दिलेल्या माहितीनुसार, तक्रारदार ज्येष्ठ महिला एरंडवणे भागातील अर्चनानगर सोसायटीत राहायला आहेत. ज्येष्ठ महिलेने शयनगृहातील टेबलावर दोन लाख रुपयांच्या साेन्याच्या बांगड्या ठेवल्या होत्या. चोरट्यांनी दोन लाख रुपयांच्या सोन्याच्या बांगड्या चोरून नेल्याची घटना नुकतीच घडली. ज्येष्ठ महिलेच्या घरात चोरी करणारा चोरटा माहितगार असल्याच्या संशय पोलिसांनी व्यक्त केला आहे. पोलिसांनी सोसायटीत कामानिमित्त येणाऱ्यांची चौकशी सुरू केली आहे. पोलीस उपनिरीक्षक महेश निंबाळकर तपास करत आहेत.
धनकवडीत सदनिकेतून दागिने लांबविले
धनकवडी भागातील सोसायटीत असलेल्या सदनिकेतून चोरट्यांनी दोन लाख रुपयांचे सोन्याचे दागिने लांबविल्याची घटना घडली. याबाबत एकाने सहकारनगर पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, चोरट्यांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार हे धनकवडीतील चैतन्यनगर सोसायटीत राहायला आहेत. सदनिकेचा दरवाजा उघडा असल्याची संधी साधून चोरट्यांनी आत प्रवेश केला. सदनिकेतून दोन लाख एक हजार रुपयांचे दागिने चोरून चोरटा पसार झाला. पोलीस उपनिरीक्षक स्वप्नील लोहार तपास करत आहेत.
