महानगरपालिकेच्या नवनिर्वाचित नगरसेविका ऐश्वर्या पठारे यांची प्रतिक्रिया
marathinews24.com
पुणे – जागतिक आर्थिक अस्थिरतेच्या पार्श्वभूमीवरही भारताची विकासगती कायम राखणारा हा केंद्रीय अर्थसंकल्प अत्यंत विचारपूर्वक मांडण्यात आला आहे. एमएसएमई क्षेत्राला बळकटी देणे, सेमीकंडक्टर संधीचा प्रभावी वापर करणे आणि टियर-२ व टियर-३ शहरांमध्ये पायाभूत सुविधा वेगाने विकसित करणे या योग्य प्राधान्यक्रमांवर तो आधारित आहे, अशी प्रतिक्रिया पुणे महानगरपालिकेच्या नवनिर्वाचित नगरसेविका आणि उद्योजिका ऐश्वर्या पठारे यांनी व्यक्त केली.
कॅपेक्स वाढ, वित्तीय शिस्तीवर भर देणारा अर्थसंकल्प : प्रा. डॉ. मेधा कुलकर्णी – सविस्तर बातमी
पुणे शहरासाठी, विशेषतः पूर्व पुण्यासाठी, हा अर्थसंकल्प मोठा दिलासा देणारा असल्याचे त्यांनी सांगितले. क्लाऊड डेटा सेंटर्ससाठी २०४७ पर्यंत देण्यात आलेली करसवलत आणि ‘बायोफार्मा शक्ती’ची घोषणा हे निर्णय शहराच्या विद्यमान क्षमतांचा प्रभावी उपयोग करण्यास पूरक ठरणार असून, यामुळे गुंतवणूक, रोजगारनिर्मिती आणि नवोन्मेषाला चालना मिळेल. पुणे-मुंबई आणि पुणे-हैदराबाद यादरम्यान प्रस्तावित हायस्पीड रेल्वे कॉरिडॉरमुळे प्रादेशिक दळणवळण अधिक सक्षम होऊन आर्थिक एकात्मता वाढेल, त्यामुळे पुण्याच्या विकासाच्या शक्यतांना नवी दिशा मिळेल, असेही त्यांनी सांगितले.
महिला, स्वयं-सहायता गट आणि क्रीडा क्षेत्रासाठी विशेष उपक्रमांचा समावेश करत हा अर्थसंकल्प सर्वांगीण, ३६० अंशांचा दृष्टिकोन मांडतो. ‘विकसित भारत’ या संकल्पनेवर आधारित असलेला हा अर्थसंकल्प स्पष्ट आणि केंद्रित विकासदृष्टी दर्शवतो, आणि तो आपली उद्दिष्टे निश्चितच साध्य करेल, असा विश्वास ऐश्वर्या पाथरे यांनी व्यक्त केला.
