रिक्षातून प्रवास करणाऱ्या चार सहप्रवासी महिलांविरुद्ध गुन्हा दाखल
marathinews24.com
पुणे – रिक्षा प्रवासी महिलेच्या पिशवीतून तीन लाख ६८ हजार रुपयांचे सोन्याचे दागिने लांबविण्यात आल्याची घटना पुणे-सोलापूर रस्त्यावर घडली. याबाबत एका महिलेने लोणी काळभोर पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, रिक्षातून प्रवास करणाऱ्या चार सहप्रवासी महिलांविरुद्ध गुन्हा दाखल करण्यात आला आहे.
इमारतीतून तोल जाऊन पडल्याने बांधकाम मजुराचा मृत्यू – सविस्तर बातमी
पोलिसांनी दिलेल्या माहितीनुसार, तक्रारदार ५१ वर्षीय महिला मूळच्या धाराशिव जिल्ह्यातील सोनेगावच्या रहिवासी आहेत. त्या १२ जुलै रोजी हडपसर गाडीतळ ते लोणी काळभोर दरम्यान सहा आसनी रिक्षाने प्रवास करत होत्या. रिक्षात त्यांच्या शेजारी चार महिला प्रवासी होत्या. प्रवासादरम्यान महिलेच्या पिशवीतून तीन लाख ६८ हजार रुपयांचे सोन्याचे दागिने लांबविण्यात आले. सहप्रवासी महिलांनी दागिने चोरी केल्याचा संशय महिलेने फिर्यादीत व्यक्त केला आहे. पोलीस उपनिरीक्षक दिगंबर सोनटक्के तपास करत आहेत.
पादचारी तरुणाचा मोबाइल हिसकावला
पादचारी तरुणाचा मोबाइल दुचाकीस्वार चोरट्याने हिसकावून नेल्याची घटना विमाननगर भागात घडली. याप्रकरणी चोरट्याविरुद्ध गुन्हा दाखल करण्यात आला आहे. याबाबत एका तरुणाने फिर्याद दिली आहे.
पोलिसांनी दिलेल्या माहितीनुसार, तक्रारदार तरुण हा विमाननगर भागातील एका सोसायटीत राहायला आहे. तो १३ जुलै रोजी सकाळी फिरायला निघाला होता. दुचाकीस्वार चोरट्याने त्याच्या हातातील ७० हजार रुपयांचा मोबाइल हिसकावून नेला. पोलीस हवालदार मांजरे तपास करत आहेत.
