दोन पिस्तूलसह बर्दापूर पोलिसांनी केली अटक
marathinews24.com
बीड (अनंत जाधव) – जिल्ह्यातील अंबाजोगाई तालुक्यातील सायगाव येथे तरुणाने गोळीबार केल्याची घटना दि.२१ जानेवारीला रात्री दोनच्या सुमारास घडली आहे. घटनेने सायगाव परिसरात खळबळ उडाली असून भीतीचे वातावरण निर्माण झाले आहे. गोळीबार करणाऱ्या सय्यद अहमदअली मुब्बशीरअली हाशमी (वय ३५) तरुणाला बर्दापूर पोलिसांनी ताब्यात घेतले आहे. आरोपीने विनापरवाना घातक शस्त्रे बाळगून लोकांच्या जीवितास धोका निर्माण होईल अशा पद्धतीने गोळीबार केल्याने परिसरात दहशत निर्माण झाली होती.
कोळवाडीत बिबट्याचा वावर; महिलेवर केला हल्ला – सविस्तर बातमी
पोलिसांनी घटनास्थळी धाव घेऊन गोळीबार करणाऱ्याला बेड्या ठोकल्या आहेत . याप्रकरणी पोलीस हवालदार गणेश विक्रम तांदळे यांनी दिलेल्या फिर्यादीवरून गुन्हा नोंद केला आहे. बर्दापूर पोलीस ठाण्याचे प्रभारी अधिकारी सहायक पोलीस निरीक्षक कांबळे आणि पोलीस उपनिरीक्षक घुले यांच्या पथकाने कारवाई केली.
झडतीदरम्यान आरोपीकडे परदेशी ‘मेड इन युएसए’ बनावटीची ९ एमएम पिस्टल, ‘मेड इन जपान’ बनावटीची रिव्हॉल्वर, तीन जिवंत काडतुसे आढळून आले आहे. मोटारसायकल आणि १ लाख ३३ हजार रुपयांचा मुद्देमाल जप्त केला आहे . गोळीबार करणाऱ्या आरोपीवर शस्त्र अधिनियम आणि भारतीय न्याय संहिता कलम ११० अन्वये कारवाई करण्यात आली आहे. वरिष्ठ पोलीस अधिकाऱ्यांच्या मार्गदर्शनाखाली पोलीस उपनिरीक्षक घुले तपास करत आहेत. आरोपीने ही शस्त्रे कोठून आणली याचा तपास पोलीस करत आहेत .
