आरोपीला जामीन मिळण्यास मदत करण्यासाठी मागितली लाच
marathinews24.com
पुणे – दाखल गुन्ह्यात आरोपीला जामीन मिळण्यास मदत करण्यासाठी वडगाव निंबाळकर (ता. बारामती) पोलिस ठाण्यात कार्यरत असलेल्या पोलिस हवालदाराने २५ हजार रुपयांची लाच मागितल्याचे निष्पन्न झाल्याने लाचलुचपत प्रतिबंधक विभागाने कारवाई करत गुन्हा दाखल केला. पोलिस हवालदार रमेश लक्ष्मण नागटिळक (४२) असे लाचखोर हवालदाराचे नाव असून, त्याने २५ हजार रुपयांची लाच मागितल्याचे एसीबीने केलेल्या तपासात निष्पन्न झाले. ही कारवाई शनिवारी (दि. ३१) करण्यात आली.
तेल खरेदीत नफा मिळवून देण्याचे आमिष; अडीच कोटींची फसवणूक – सविस्तर बातमी
तक्रारदार महिलेच्या मुलाविरोधात वडगाव निंबाळकर पोलिस ठाण्यात गुन्हा दाखल असून, या प्रकरणात जामिनासाठी मदत करण्यासाठी तसेच गुन्ह्याचे चार्जशीट लवकर न्यायालयात दाखल करण्यासाठी पोलिस हवालदार नागटिळक याने सुरुवातीला ३० हजार रुपयांची लाच मागितल्याचे तक्रारीत नमूद केले होते. तडजोडीनंतर ही रक्कम २५ हजार रुपयांवर निश्चित करण्यात आली. यानंतर तक्रारदाराने १८ जानेवारीला लाचलुचपत प्रतिबंधक विभागाकडे तक्रार दाखल केली. तक्रारीची पडताळणी करून सापळा रचला. त्यानंतर शनिवारी पोलिस हवालदार रमेश नागटिळक याने पैसे मागितल्याचे निष्पन्न होताच एसीबीच्या पथकाने ताब्यात घेतले. याप्रकरणी वडगाव निंबाळकर पोलिस ठाण्यात भ्रष्टाचार प्रतिबंधक अधिनियम १९८८ अंतर्गत गुन्हा दाखल केला आहे.
