९० हजारांची सोनसाखळी हिसकावून चोरटे पसार
marathinews24.com
पुणे – घरात एकटे असलेल्या ज्येष्ठ नागरिकाच्या डोळ्यात मिरची पूड टाकून चोरट्यांनी ९० हजारांची सोनसाखळी हिसकावून नेल्याची घटना हडपसर भागातील मांजरी परिसरात घडली. याप्रकरणी चोरट्यांविरुद्ध हडपसर पोलिसांनी गुन्हा दाखल केला आहे. ६५ वर्षीय नागरिकाने हडपसर पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, चोरट्याविरुद्ध गुन्हा दाखल केला आहे.
सिंहगड रस्ता भागात टोळक्याचा राडा; १२ ते १५ वाहनांची केली तोडफोड – सविस्तर बातमी
पोलिसांनी दिलेल्या माहितीनुसार, तक्रारदार ज्येष्ठ नागरिक मांजरीतील तुकाराम तुपेनगर भागात राहायला आहेत. रविवारी रात्री आठच्या सुमारास ते घरात एकटे असताना, अचानक एक चोरटा घरात शिरला. त्याने तक्रारदार जेष्ठाच्या गुडघ्यावर कठीण वस्तूने प्रहार केला. चोरट्याने त्यांच्या डोळ्यात मिरची पूड टाकली. त्यांच्या गळ्यातील ९० हजारांची सोनसाखळी हिसकावून चोरटा पसार झाला. ज्येष्ठ नागरिकांनी आरडाओरडा केल्यानंतर शेजारी धावत आले. घटनेची माहिती पोलिसांना कळविण्यात आली. घरात एकटे असलेल्या ज्येष्ठाच्या डोळ्यात मिरची पूड टाकून लुटल्याची घटना घडल्याने परिसरात घबराट उडाली. पोलीस उपनिरीक्षक सत्यवान गेंड तपास करत आहेत.
