कारागृह प्रशासनाकडून विशेष मोहिम
marathinews24.com
पुणे – राज्यातील महत्त्वाच्या समजल्या जाणाऱ्या येरवडा कारागृह प्रशासनाने विशेष तपासणी मोहिम राबविली. कारागृहाच्या परिसरात झडती घेण्यात आल्यानंतर बराकीत ५ मोबाइल, दोन पाॅवर बँक, चार्जिंग वायर सापडली आहे. कारागृहाच्या आवारात मोबाइल सापडल्यामुळे कैदी मोबाइलचा वापर करत असल्याचे स्पष्ट झाले आहे. याप्रकरणी येरवडा पोलिसांनी गुन्हा दाखल केला.
गरजूंसाठी ‘पृथ्वी मोबाईल क्लिनिक’ करतेय अवघ्या पाच रुपयात तपासणी, औषधोपचार – सविस्तर बातमी
कैदी नौशाद बद्रुद्दीन शेख याच्यासह अन्य कैद्यांविरुद्ध गुन्हा दाखल करण्यत आला आहे. सहायक तुरुंगाधिकारी सुनील गायकवाड यांनी येरवडा पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, २१ फेब्रुवारी रोजी सायंकाळी येरवडा कारागृहात गायकवाड हे नियमित गस्त घालत होते. त्यावेळी कारागृहातील भिंतीजवळ असलेल्या स्वच्छतागृहाजवळ कैदी थांबला होता. त्याच्या संशयास्पद हालाचली गायकवाड यांनी टिपल्या. शेखची चौकशी करण्यात आली. तेव्हा त्याने जमिनीवर मोबाइल पडल्याचे सांगितले. उडवाउडवीची उत्तरे देऊन तो बराकीत गेला. त्यानंतर गायकवाड यांनी याबाबतचा अहवाल वरिष्ठ अधिकाऱ्यांना अहवाल दिला. त्यानंतर २२ फेब्रुवारीला दुपारी साडेचार ते सायंकाळी साडेसहा दरम्यान विशेष मोहिम राबविण्यात आली.
बराक क्रमांक एकमधील कैदी नौशाद शेख राहत असलेल्या बराक क्रमांक एकची झडती घेण्यात आली. तेथे ठेवलेल्या पिशवीची तपासणी करण्यात आली. तेव्हा तपासणीत मोबाइल, बॅटरी, सीमकार्ड, चार्जिंग वायर सापडली. त्यानंतर बराक क्रमांक एक, दोन, सहाची झडती घेण्यात आली. चार मोबाइल , बॅटरी, दोन पाॅवर बँक सापडल्या.
कारागृहात मोबाइल वापरास बंदी असताना आदेशाचे उल्लंघन केल्याप्रकरणी गुन्हा दाखल करण्यात आले आहे. पोलीस उपनिरीक्षक कुंदन सत्रे तपास करत आहेत.
