केजमध्ये तणाव, नातेवाईकांचा पोलीस ठाण्यात ठिय्या
marathinews24.com
बीड :(अनंत जाधव) – अनैतिक संबंधाच्या संशयावरून सुरू असलेले भांडण मिटवण्यासाठी गेलेल्या हॉटेल चालकाची चाकू भोकसून निर्घृण हत्या करण्यात आल्याची धक्कादायक घटना बीड जिल्ह्यातील कदमवाडी फाट्यावर समोर आली आहे. घटनेने परिसरात खळबळ उडाली असून तणावाचे वातावरण निर्माण झाले आहे. विलास घुले असे हत्या झालेल्या हॉटेल चालकाचे नाव असून, गंभीर जखमी झाल्यानंतर अंबाजोगाई येथील स्वामी रामानंद तीर्थ ग्रामीण रुग्णालयात उपचार सुरू असताना २१ जूनला दुपारी त्यांचा दुर्दैवी मृत्यू झाला. घटनेमुळे केज परिसरात तीव्र संताप व्यक्त होत असून, मारेकऱ्यांना तात्काळ अटक करण्याच्या मागणीसाठी नातेवाईकांनी पोलीस ठाण्यात ठिय्या मांडला. छत्रपती शिवाजी महाराज चौकात दोन वेळा रस्ता रोको आंदोलन केल्याने काही काळ वाहतूक ठप्प झाली होती.
पुण्यात कडक बंदोबस्तात ‘नीट’ परीक्षा – सविस्तर बातमी
कदमवाडी फाट्यावरील ‘हॉटेल गावकरी’चे चालक विलास घुले, आकाश चाळक, उमेश माने आणि स्वयंपाकी गणेश शुक्ला हे २० जून रोजी सायंकाळी साडेसात वाजेच्या सुमारास हॉटेलवर बसलेले होते. याच वेळी पांढऱ्या रंगाच्या स्कॉर्पिओ गाडीतून बाबासाहेब कदम, मंगेश कदम, रामेश्वर गायकवाड आणि त्यांचे इतर नातेवाईक तेथे आले. बाबासाहेब कदम याने अनैतिक संबंधाच्या संशयावरून उमेश माने याला मारहाण सुरू केली. जीव वाचवण्यासाठी उमेश माने केजच्या दिशेने पळाला असता, त्याला वाचवण्यासाठी नितीन घुले आणि हॉटेल मालक विलास घुले हे देखील त्याच्या मागे धावले.
त्यांच्या पाठीमागे आलेल्या बाबासाहेब कदम, मंगेश कदम, रामेश्वर गायकवाड, शुभम गायकवाड, भैय्यासाहेब गायकवाड, अजय उर्फ बंकट कदम, नवनाथ कदम, दीपक कदम आणि संतोष कदम यांनी रेणु बारसमोरील बंद समर्थ बिअर बारजवळ नितीन आणि विलास घुले यांना अडवले. या सर्वांनी विलास घुले यांना मारहाण करण्यास सुरुवात केली आणि त्याच वेळी बाबासाहेब कदम याने सोबत आणलेला धारदार चाकू नितीन घुले यांच्या समोरच विलास घुले यांच्या पोटात खुपसला.
रक्ताच्या थारोळ्यात पडलेल्या विलास घुले यांना तात्काळ केज येथील शासकीय रुग्णालयात आणि त्यानंतर पुढील उपचारासाठी अंबाजोगाई येथे हलवण्यात आले होते, मात्र उपचारादरम्यान त्यांची प्राणज्योत मालवली आहे. घटनेमुळे परिसरात शोककळा पसरली असून हळहळ व्यक्त होत आहे.
पोलिस बंदोबस्त तैनात
घटनेनंतर शहरात निर्माण झालेली कायदा व सुव्यवस्थेची परिस्थिती आणि संभाव्य अनुचित प्रकार टाळण्यासाठी सहाय्यक पोलीस अधीक्षक व्यंकटराम, पोलीस निरीक्षक स्वप्नील उनवणे, सहाय्यक पोलीस निरीक्षक संदीप मांजरमे यांच्या मार्गदर्शनाखाली युसुफवडगाव, धारूर आणि नेकनूर येथून पोलिसांचा मोठा फौजफाटा केज शहरात तैनात करण्यात आला आहे. पोलीस या प्रकरणाचा पुढील तपास करत आहेत.
