फ्लॅटचे कुलूप तोडून चोरट्यांनी मारला डल्ला
marathinews24.com
पुणे – फ्लॅटचे कुलूप तोडून चोरट्यांनी कपाटातील अडीच लाख रुपयांची रोकड चोरुन नेल्याची घटना पाषाण-सुस रस्त्यावर घडली. याबाबत एका तरुणाने बाणेर पोलीस ठाण्यात फिर्याद दिली आहे. त्याने दिलेल्या फिर्यादीनुसार, चोरट्यांविरुद्ध गुन्हा दाखल करण्यात आला आहे.
सायबर चोरट्यांकडून तरुणीची ७ लाखांची फसवणूक – सविस्तर बातमी
पोलिसांनी दिलेल्या माहितीनुसार, तक्रारदार तरुण आणि कुटुंबीय हे पाषाण-सूस रस्त्यावरील एका सोसायटीत राहायला आहेत. २५ जून रोजी चोरट्यांनी सायंकाळी सदनिकेचे कुलूप तोडून आत प्रवेश केला. शयनगृहातील कपाट उचकटून चोरट्यांनी अडीच लाख रुपयांचे सोन्याचे दागिने लांबविले. घरफोडीचा प्रकार उघडकीस आल्यानंतर पोलिसांकडे तरुणाने तक्रार दिली. पोलिसांनी सोसायटीच्या आवारातील सीसीटीव्ही चित्रीकरण ताब्यात घेतले असून, पोलीस उपनिरीक्षक सुप्रिया मांढरे तपास करत आहेत.
मिठाई विक्री दुकानातून रोकड चोरली
शिवाजीनगर रेल्वे स्थानक परिसरातील मिठाई विक्री दुकानातून चोरट्यांनी २५ हजार रुपयांची रोकड आणि दोन मोबाइल संच असा मुद्देमाल चोरुन नेल्याची घटना घडली. याबाबत मिठाई विक्रेत्याने शिवाजीनगर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, शिवाजीनगर रेल्वे स्थानक परिसरात विजय स्वीट मार्ट हे मिठाई विक्री दुकान आहे. चोरट्यांनी मिठाई विक्री दुकानाचे कुलूप तोडले. गल्ल्यातील २५ हजारांची रोकड आणि मोबाइल चोरुन चोरटे पसार झाले. सहायक पोलीस निरीक्षक पाटील तपास करत आहेत.
