जीवाचे वाईट करतो म्हणाला अन काही तासांत झाला हजर
marathinews24.com
पुणे – शहरात गणेशोत्सवात कायदा सुव्यवस्थेचे नियोजन सुरू असताना स्पा सेंटरमधील तत्कालीन वसुली वाल्या पोलीस अमलदाराने थेट पोलीस आयुक्त अमितेश कुमार यांना जीवाचे बरेवाईट करण्याचा मेसेज केला. मोबाइल बंद करुन त्याने अंडरग्राउंड होण्याचा प्रयत्न केला. यामुळे आता आपल्याला सहानभूती मिळेल, साईट पोस्टिगवरुन चांगल्या ठिकाणी बदली होईल अशी त्याची अपेक्षा होती. प्रत्यक्षात मात्र, पोलीस प्रशासनाने संबंधित अमलदाराचा शोध घेऊन त्याला आयुक्तालयात येण्यास भाग पाडले. अखेर आयुक्तांनी दिलेल्या कानपिचक्यानंतर कर्मचार्‍याची चांगलीच तंतरली होती.
पुण्यात अल्पवयीन आरोपींची धिंड पोलिसांना भोवणार – सविस्तर बातमी
हा कर्मचारी अडीच वर्षांपुर्वी शहरातील बहुतांश स्पा, मसाज सेंटर व्यावसायिकांकडून वसुलीचे काम करत होता. मात्र, पोलीस आयुक्त अमितेश कुमार यांनी पदभार घेतल्यानंतर अवघ्या काही दिवसांत त्यांनी ६४ वसुलीबाज अमलदारांना वठणीवर आणले होते. तेव्हापासून त्याच्यासह बहुतांश वसुलीवाले अमलदार पोलीस मुख्यालयासह साईट पोस्टिंगवर आहेत. अद्यापपर्यंत त्यांना अपेक्षित गुन्हे शाखा, तपास पथकासह महत्वाच्या ठिकाणी नियुक्ती नाही. दरम्यान, संबंधित अमलदार मुख्यालयातील नियुक्तीला कंटाळला होता. त्यामुळे पोलीस मुख्यालयातील अधिकार्‍याच्या त्रासाला कंटाळून वाईट विचार करण्याचा निर्णय घेत असल्याचा मेसेज त्यान आयुक्तांना करुन सहानुभूती मिळवण्याचा प्रयत्न केला. तसेच आपल्याविरुद्ध वारंवार निनावी तक्रारी अर्ज केले जात असून, एकाठिकाणी बंदोबस्ताला असलेल्या ठिकाणावरील वादामुळे त्रास होत असल्याचा उल्लेख त्याने अर्जात केला आहे. मात्र, उलटेच घडल्यामुळे पोलीस दलात चर्चा रंगली होती.
