कात्रज-कोंढवा रस्त्यावरील गोकुळनगर परिसरात घटना
marathinews24.com
पुणे – सोसायटीच्या सामायिक मीटरवर इलेक्ट्रिक दुचाकी चार्ज करण्यास विरोध केल्याचा जाब विचारणे एका तरुणाला चांगलेच महागात पडले. याच कारणावरून झालेल्या वादात तिघांनी त्याला मारहाण केली. यावेळी धक्का देऊन खाली पाडल्याने त्याच्या डाव्या हाताला फ्रॅक्चर झाले. कात्रज-कोंढवा रस्त्यावरील गोकुळनगर परिसरात ही घटना घडली. या प्रकरणी प्रथमेश खेतले (रा. खोपडे हाईट्स, खोपडेनगर, कात्रज) आणि त्याच्या दोन मित्रांविरुद्ध भारती विद्यापीठ पोलिस ठाण्यात गुन्हा दाखल करण्यात आला आहे. शुभम राजेंद्र कोंढाळकर (वय २६, रा. खोपडे हाईट्स) यांनी फिर्याद दिली आहे.
गुंतवणुकीच्या नावाखाली कुटुंबाची १७ लाखांची फसवणूक – सविस्तर बातमी
पोलिसांनी दिलेल्या माहितीनुसार, ४ ऑक्टोबर रोजी सकाळी साडेदहा वाजण्याच्या सुमारास गोकुळनगरमधील इंडियन ऑईल पेट्रोल पंपाच्या पुढे ही घटना घडली. कोंढाळकर आणि खेतले हे एकाच इमारतीत राहतात. सोसायटीच्या सामायिक मीटरवर स्वतःची इलेक्ट्रिक दुचाकी चार्ज करू नये, असे कोंढाळकर यांनी खेतलेला सांगितले. यावरून दोघांमध्ये वाद झाला. शिवीगाळ केल्यानंतर खेतलेने फोन करून दोन मित्रांना बोलावून घेतले. त्यानंतर तिघांनी कोंढाळकर यांना मारहाण केली. यावेळी एका मित्राने त्यांना धक्का देऊन खाली पाडले. या प्रकारात त्यांच्या डाव्या हाताला गंभीर दुखापत होऊन फ्रॅक्चर झाले. सोसायटीतील सामायिक वीजवापराचा प्रश्न बोलून सोडवण्याऐवजी वाद थेट मारहाणीपर्यंत पोहोचला. पुढील तपास पोलिस अमंलदार नवनाथ खताळ करत आहेत.
