नांदेडसिटी पोलीस ठाण्यात दाखल
marathinews24.com
पुणे – पोलीस असल्याची बतावणी करीत सायबर चोरट्यांनी जेष्ठ नागरिकाला दहशतवाद्यांसाठी पैसे पाठवत असल्याचा आरोप केला. संबंधित प्रकरणात अटकेची भीती दाखवून तब्बल ३६ लाख रूपयांचा गंडा घातला आहे. ही घटना ८ ते १६ डिसेंबर २०२५ कालावधीत धायरीत घडली आहे. याप्रकरणी ७९ वर्षीय जेष्ठ नागरिकाने नांदेडसिटी पोलीस ठाण्यात फिर्याद दाखल केली आहे. त्यानुसार मोबाइलधारकासह बँक खातेधारकाविरूद्ध गुन्हा दाखल करण्यात आला आहे.
डंपरच्या धडकेत दुचाकीस्वार तरुणाचा मृत्यू – सविस्तर बातमी
पोलिसांनी दिलेल्या माहितीनुसार, तक्रारदार हे ७९ वर्षीय असून धायरीत राहायला आहेत. ८ डिसेंबरला सायबर चोरट्यांनी त्यांना फोन करून पोलीस असल्याची बतावणी केली. तक्रारदार जेष्ठाच्या मोबाइलद्वारे अनेकांना अश्लील कॉलसह पॉर्नग्राफी केली जात असल्याच्या तक्रारी पोलिसांना प्राप्त झाल्याचे सांगण्यात आले. तसेच बँक खात्यातून दहशतवाद्यांसाठी पैसे पुरवले जात असल्याची बतावणी सायबर चोरट्यांनी केली. सर्वोच्च न्यायालयाच्या आदेशाचे पत्र पाठवून, तक्रारदाराला अटक करण्याची भीती दाखवण्यात आली.
सायबर चोरट्यांनी जेष्ठ तक्रारदाराकडून सर्व बँक खात्याची माहिती घेतली. संबंधित बँक खात्यातील रकमांची पडताळणी करण्यासाठी पैसे जमा करण्यास सांगितले. त्यानंतर सायबर चोरट्यांनी तक्रारदारावर दबाव टाकून त्यांना दिलेल्या बँकखात्यात रक्कम जमा करण्यास भाग पाडले. तब्बल ३६ लाख रूपये जमा केल्यानंतरही सायबर चोरटे त्यांच्याकडून रकमेची मागणी करीत होते. फसवणूक झाल्याचे लक्षात आल्यानंतर संबंधिताने पोलीस ठाण्यात धाव घेत फिर्याद दाखल केली आहे. याप्रकरणी वरिष्ठ पोलीस निरीक्षक अतुल भोस तपास करीत आहेत.
