अधिकाधिक नागरिकांनी या सप्ताहात सहभागी होवून लाभ घ्यावा उपविभागीय अधिकारी रेवणनाथ लबडे यांचे आवाहन
marathinews24.com
पुणे – दौंड तालुक्यात महसूल सप्ताहाचे आयोजन – महसूल विभागाकडून देण्यात येणाऱ्या सेवा, विविध योजनांची माहितीसह अधिकाधिक नागरिकांना लाभ मिळण्याकरिता 1 ते 7 ऑगस्ट 2025 कालावधीत महसूल सप्ताहाचे आयोजन करण्यात येणार आहे. अधिकाधिक नागरिकांनी या सप्ताहात सहभागी होवून लाभ घ्यावा, असे आवाहन उपविभागीय अधिकारी रेवणनाथ लबडे यांनी केले आहे.
इतर मागास बहुजन कल्याण विभागामार्फत शासकीय वसतिगृह प्रवेश प्रक्रिया सुरू – सविस्तर बातमी
यामध्ये 1 ऑगस्ट रोजी महसूल दिन आणि महसूल सप्ताहाचा शुभारंभ, 2 ऑगस्ट रोजी शासकीय जागेवर सन 2011 पूर्वीपासून रहिवासी प्रयोजनार्थ अतिक्रमण असलेल्या कुटुंबांपैकी अतिक्रमण नियमानुकूल करण्यास पात्र असलेल्या कुटुंबांना सदर अतिक्रमित जागांचे पट्टे वाटप करण्याबाबत कार्यक्रमाचे आयोजन करण्यात येणार आहे.
3 ऑगस्ट रोजी पाणंद, शिवरस्त्यांची मोजणी करुन त्यांच्या दुतर्फा झाडे लावणे, 4 ऑगस्ट रोजी ‘छत्रपती शिवाजी महाराज महाराजस्व अभियान’ प्रत्येक मंडळनिहाय राबविणे, 5 ऑगस्ट रोजी विशेष साहाय्य योजनेतील थेट लाभ हस्तांतरण (डीबीटी) न झालेल्या लाभार्थ्यांना घरभेटी करुन डीबीटी करुन अनुदानाचे वाटप करणे, संगायो व पुरवठा लाभार्थींचे ई केवायसी पूर्ण करणे, 6 ऑगस्ट रोजी शासकीय जमिनींवरील अतिक्रमणे निष्कासित करणे व ती अतिक्रमणमुक्त करणे, तसेच शर्तभंग झालेल्या जमिनींबाबत शासन धोरणानुसार (नियमानुकूल करणे/सरकारजमा करणे) निर्णय घेणे, कब्जेहक्क भाडेपट्ट्याने दिलेल्या जमिनींची तपासणी करणे आणि 7 ऑगस्ट रोजी एम-सँड (M-Sand) धोरणाची अंमलबजावणी करणे व नवीन मानक कार्यप्रणालीप्रमाणे धोरण पूर्णत्वास नेणे आणि महसूल सप्ताह सांगता समारंभ याबाबत कार्याक्रमाचे आयोजन करण्यात आले आहे. असेही श्री. लबडे यांनी प्रसिध्दी पत्रकान्वये कळविले आहे.
