भरदिवसा सराफाची दागिन्याची बॅग पळवली
marathinews24.com
बीड (अनंत जाधव) – जिल्ह्यातील नेकनूरच्या बाजारामध्ये रविवारी ( दि ११) भरदिवसा सराफाची सोन्याची पिशवी हिसकावून नेल्याची घटना घडली आहे. घटनेने परिसरात खळबळ उडाली आहे. नेकनूरच्या बाजारामध्ये अज्ञात चोरट्यांनी बाजारामध्ये दुकान लावत असलेल्या सराफाची चांदीची बॅग लंपास केली. यामध्ये तब्बल १५ ते २० किलो चांदी असल्याचे सांगण्यात आले. त्याची अंदाजे किंमत ४० लाखांवर आहे.
मेट्रोमोनिअलद्वारे लग्नाच्या आमिषाने महिलेला गंडा – सविस्तर बातमी
पोलिसांना माहिती मिळताच घटनास्थळी नेकनूर पोलीस दाखल झाले. बाजारामध्ये चोरट्यांचा शोध पोलीसांकडून सुरू केला. या चोरीच्या घटनेने जिल्ह्यात पुन्हा एकदा कायदा व सुव्यवस्थेबाबतचा सवाल नागरिकांमध्ये उपस्थित झाला आहे. नेकनूर येथील बबनराव कानडे हे सराफ व्यापारी बाजारामध्ये सोन्या चांदीचा व्यवसाय करतात. दि.११ रोजी सकाळी अकराच्या सुमारासत्यांनी नेहमीप्रमाणे दुकान उघडले होते. मकर संक्रातीचा बाजार असल्याने महिलांसाठी चैन, पायातील पैंजन, जोडवेयासह अन्य चांदीचे आभूषण मोठ्या प्रमाणात विक्रीसाठी आणले होते. पंधरा ते वीस किलो चांदी असलेली बॅग त्यांनी गाड्यावर ठेवली आणि खाली चटई अंथरू लागले होते.
तेवढ्यात काही मिनिटांच्या कालावधीमध्ये त्याठिकाणी चोरटे आले. त्या अज्ञात चोरट्यांनी त्यांची बॅग घेऊन पळ काढला. ही घटना दुपारी बाराच्या सुमारास घडली. त्यांनी तात्काळ नेकनूर पोलिस ठाणे गाठून याची माहिती पोलिसांना दिली. पोलीस निरीक्षक आप्पासाहेब रोकडे, उपनिरीक्षक तांदळे, प्रशांत क्षीरसागर, रतन निनगुडे, बाळा ढाकणे यांनी घटनास्थळी धाव घेतली. घटनास्थळाचा पंचनामा करण्यात आला आहे.
