सहकारनगरमधील जेष्ठाला गंडा
marathinews24.com
पुणे – शेअर ट्रेडींगमध्ये गुंतवणूकीसाठी टीप्स देण्याच्या बतावणीने सायबर चोरट्यांनी एका जेष्ठ नागरिकाला तब्बल १ कोटी ५२ लाखांचा गंडा घातला आहे. ही घटना ७ डिसेंबर २०२५ ते ७ फेबु्रवारी २०२६ कालावधीत सहकारनगरमध्ये घडली आहे. याप्रकरणी सतीश करंदीकर वय ६५ यांनी सायबर पोलीस ठाण्यात फिर्याद दाखल केली आहे. त्यानुसार मोबाइलधारक व बँक खातेधारकाविरूद्ध सायबर पोलीस ठाण्यात गुन्हा दाखल करण्यात आला आहे.
पुण्यात सायबर घोटाळ्याच्या नावाखाली १ कोटी ६२ लाखाचा गंडा – सविस्तर बातमी
पोलिसांनी दिलेल्या माहितीनुसार, तक्रारदार करंदीकर हे सहकारनगमध्ये राहायला असून, ७ डिसेंबरला सायबर चोरट्यांनी त्यांच्या व्हॉट्सअॅपवर मेसेज पाठविला होता. त्यांना शेअर मार्केटमध्ये गुंतवणूकीच्या टीप्स देतो, अशी बतावणी करण्यात आली. त्यानंतर काही दिवस सायबर चोरट्यांनी त्यांना मेसेज पाठवून विश्वास संपादित केला. त्यानंतर त्यांना शेअर ट्रेडींगमध्ये गुंतवणूकीला भाग पाडले. सायबर चोरट्यांनी सांगितल्याप्रमाणे त्यांनी अवघ्या दोन महिन्यांत १ कोटी ५२ लाख रूपयांची गुंतवणूक केली. मात्र, फसवणूक झाल्याचे लक्षात आल्यानंतर त्यांनी सायबर पोलीस ठाण्यात फिर्याद दाखल केली आहे. याप्रकरणी पोलीस निरीक्षक संगीता देवकाते तपास करीत आहेत.
