पती, सासूसह नातेवाईकांविरुद्ध गुन्हा
marathinews24.com
पुणे – मुलं होत नसल्याने छळ केल्याने संगणक अभियंता तरुणीने तिसऱ्या मजल्यावरुन उडी मारुन आत्महत्या केल्याची धक्कादायक घटना सिंहगड रस्ता परिसरात घडली. संगणक अभियंता तरुणीला आत्महत्येस प्रवृत्त केल्याप्रकरणी पती, सासू, तसेच नातेवाईकांविरुद्ध गुन्हा दाखल करण्यात आला.
नारायणगाव, पारगावात सोनसाखळी चोरीसह दागिन्यांची लूट करणाऱ्या टोळीला अटक – सविस्तर बातमी
दीप्ती प्रदीप एकशिंगे (वय २७, रा. माणिकबाग, सिंहगड रस्ता) असे आत्महत्या केलेल्या तरुणीचे नाव आहे. याबाबत दीप्ती यांचे भाऊ डाॅ. किरण तुषार दूधबळे (वय ३०, रा. चामोर्शी, जि. गडचिरोली) यांनी सिंहगड रस्ता पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, पती प्रदीप विठ्ठल एकशिंगे, सासू सुरेखा, तसेच नातेवाईकांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, दीप्ती मूळची गडचिरोली जिल्ह्यातील चार्मोशी गावची रहिवासी होती. तिचे पती संगणक अभियंता आहेत. एका माहिती-तंत्रज्ञान कंपनीत काम करताना त्यांची ओळख झाली. ओळखीतून त्यांच्यात प्रेमसंबंध निर्माण झाले. त्यानंतर १७ नोव्हेंबर २०२४ रोजी दोघांनी पुण्यात प्रेमविवाह केला. विवाहानतर मुलं होत नसल्याने पती, सासू, तसेच नातेवाईकांकडून दीप्तीचा छळ सुरू करण्यात आला. तिला टोमणे मारण्यात आले. छळामुळे तिने १७ जून रोजी इमारतीतील तिसऱ्या मजल्यावरुन उडी मारून आत्महत्या केली, असे दीप्तीचे भाऊ डाॅ. दुधबळे यांनी फिर्यादीत म्हटले आहे. सहायक पोलीस निरीक्षक राजकुमार अडागळे तपास करत आहेत.
