पोलिसांनी याप्रकरणी निवृत्त जवानाला केली अटक
marathinews24.com
पुणे – निवृत्त लष्करी जवानाने नात्यातील एकाच्या घरातून ४ लाख २६ हजारांचे सोन्याचे दागिने लांबविल्याची घटना उघडकीस आली. मुंढवा पोलिसांनी याप्रकरणी निवृत्त जवानाला अटक केली आहे. संदीप सुरेश चव्हाण (वय ४३, रा. साईसिद्धी काॅलनी, आदर्शनगर, दिघी) असे अटक करण्यात आलेल्या जवानाचे नाव आहे. महिलेने मुंढवा पोलीस ठाण्यात फिर्याद दिली आहे.
पुण्यातून सराईतांना दणका; एकाचवेळी १८ सराईत तडीपार – सविस्तर बातमी
तक्रारदार महिलेचे पती लष्करात जवान असून, ते चेन्नईत नियुक्तीस आहेत. आरोपी संदीप चव्हाण हा लष्करातून निवृत्त झाला असून, तो तक्रारदार महिलेच्या नात्यातील आहे. महिला आणि तिचा मुलगा २६ सप्टेंबर रोजी नातेवाईकांना भेटण्यासाठी बाहेरगावी गेली होती. चार दिवसानंतर महिला घरी परतली. तेव्हा सदनिकेतील बॅगेत ठेवलेले चार लाख २६ हजार रुपयांचे सोन्याचे दागिने चोरीला गेल्याचे लक्षात आले. महिलेने याबाबत मुंढवा पोलिसांकडे तक्रार दिली. त्यानंतर पोलिसांनी तपास सुरू केला.
सहायक पोलीस निरीक्षक राजू महानोर यांनी सीसीटीव्ही चित्रीकरण तपासले. तांत्रिक तपासात सदनिकेचे कुलूप बनावट चावीने उघडून दागिने चोरल्याची माहिती मिळाली. चौकशीत निवृत्त जवान चव्हाण याने दागिने लांबविल्याचे उघडकीस आले. त्यानंतर पोलिसांनी त्याला ताब्यात घेतले. चैाकशीत त्याने दागिने चोरल्याची कबुली दिली. परिमंडळ पाचचे पोलीस उपायुक्त डाॅ. राजकुमार शिंदे, सहायक आयुक्त अनुराधा उदमले यांच्या मार्गदर्शनाखाली मुंढवा पोलीस ठाण्याच्या वरिष्ठ पोलीस निरीक्षक माया देवरे, गुन्हे शाखेचे पोलीस निरीक्षक बाबासाहेब निकम, सहायक निरीक्षक राजू महानोर, पोलीस कर्मचारी राजू कदम, शिवाजी जाधव, राहुल धोत्रे, राहुल मोरे, शिवाजी धांडे, रुपेश तोडेकर यांनी ही कामगिरी केली.
