वारजे माळवाडी पोलीस ठाण्यात गुन्हा दाखल
marathinews24.com
पुणे – शेअर ट्रेडींगमध्ये गुंतवणूक केल्यास चांगला परतावा मिळवून देण्याचे आमिष दाखवून सायबर चोरट्यांनी तरूणाला ८ लाख २० हजारांचा ऑनलाईन गंडा घातला आहे. ही घटना ११ फेबु्रवारी ते १५ एप्रिल कालावधीत कर्वेनगरमध्ये घडली आहे. याप्रकरणी तरूणाने वारजे माळवाडी पोलीस ठाण्यात फिर्याद दाखल केली आहे. त्यानुसार मोबाइलधारकाविरूद्ध गुन्हा दाखल केला आहे.
वडारवाडीत तरूणावर वार, आरोपीला अटक – सविस्तर बातमी
पोलिसांनी दिलेल्या माहितीनुसार, तक्रारदार तरूण कर्वेनगरमध्ये राहायला असून, ११ फेबु्रवारीला सायबर चोरट्याने त्यांना व्हॉटसअप मेसेज केला. शेअर ट्रेडींगमध्ये गुंतवणूक केल्यास चांगला नफा मिळवून देतो, अशी बतावणी केली. त्यांचा विश्वास संपादित केल्यानंतर सायबर चोरट्याने तक्रारदाराला रक्कम पाठविण्यास भाग पाडले. ८ लाख २० हजार रूपये पाठवूनही त्यांना परतावा मिळाला नाही. त्यामुळे तक्रारदाराने पोलीस ठाण्यात धाव घेतली. याप्रकरणी पोलीस निरीक्षक नीलेश बडाख तपास करीत आहेत.
पार्टटाईम नोकरीचे आमिष दाखवून लुटले
पार्टटाईम नोकरी देण्याचे आमिष दाखवून सायबर चोरट्यांनी २० वर्षीय तरूणाला ३ लाख १८ हजारांचा ऑनलाईन गंडा घातला आहे. ही घटना २४ मे ते १४ जुलै कालावधीत कर्वेनगरात घडली आहे. याप्रकरणी तरूणाने वारजे माळवाडी पोलीस ठाण्यात फिर्याद दाखल केली आहे. त्यानुसार मोबाइल धारकविरूद्ध गुन्हा दाखल केला आहे.
पोलिसांनी दिलेल्या माहितीनुसार, तक्रारदार तरूण कर्वेनगरात राहायला असून, २४ मे रोजी सायबर चोरट्यांनी त्याला व्हॉटसअॅपवर लिंक पाठविली होती. पार्टटाईम जॉब देण्याचे आमिष दाखवून सायबर चोरट्यांनी तरूणाचा विश्वास संपादित केला. त्याला ३ लाख १८ हजार रूपये पाठविण्यास भाग पाडून फसवणूक केली आहे. याप्रकरणी पोलीस निरीक्षक नीलेश बडाख तपास करीत आहेत.
