बंडगार्डन पोलिस ठाण्यात गुन्हा दाखल
marathinews24.com
पुणे – आरोग्य सेवकाने बदलीसाठी ३ लाख रुपयांची लाच स्वीकारल्याप्रकरणी लाचलुचपत प्रतिबंधक विभागाने (एसीबी) कारवाई केली आहे. जिल्हा परिषद आरोग्य विभागातील रामकिसन गंगाधर घ्यार (४३) याला अटक करण्यात आले आहे. तो पुणे जिल्हा परिषद आरोग्य विभागात कार्यरत आहे.
सासरच्या छळामुळे महिलेची गळफास घेऊन आत्महत्या – सविस्तर बातमी
तक्रारदार हे आरोग्य सेवक असून, त्यांची जून २०२५ मध्ये उपसंचालक आरोग्य कार्यालय, कोल्हापूर मंडळ येथून पुणे मंडळात बदली झाली होती. मात्र पुणे मंडळात नियुक्ती न देता त्यांना आरोग्य सेवक पदावरून कार्यमुक्त करण्यात आले होते. त्यानंतर त्यांनी प्राथमिक आरोग्य केंद्र वडगाव, ता. इंदापूर येथे रिक्त पदावर नियुक्ती मिळावी यासाठी बदलीचा अर्ज केला होता. या प्रकरणात उपसंचालक आरोग्य, पुणे मंडळ कार्यालयातील अधिकारी डॉ. भगवान पवार यांच्या संपर्कात आरोपी रामकिशन घ्यार हा मध्यस्थ म्हणून कार्यरत होता. बदलीचे काम करून देण्यासाठी आरोपीने तक्रारदाराकडे ३ लाख रुपयांची लाच मागितली. याबाबत तक्रारदाराने २ डिसेंबर २०२५ रोजी पुणे लाचलुचपत प्रतिबंधक विभागाकडे तक्रार दाखल केली.
तक्रारीच्या अनुषंगाने ४ व ५ डिसेंबर रोजी पडताळणी करण्यात आली असता, लाचेची मागणी झाल्याचे निष्पन्न झाले. अखेर २ जानेवारी २०२६ रोजी जिल्हा परिषद, पुणे कार्यालयासमोर सार्वजनिक रस्त्यावर सापळा रचण्यात आला. आरोपी रामकिशन घ्यारने तक्रारदाराकडून ३ लाख रुपयांची लाच स्वीकारताच एसीबी पथकाने त्याला रंगेहाथ पकडले. या प्रकरणी बंडगार्डन पोलिस ठाण्यात आरोपीविरोधात भ्रष्टाचार प्रतिबंध अधिनियम १९८८ अंतर्गत गुन्हा दाखल करण्यात आला असून, पुढील तपास सुरू आहे.
