अपघातातील जखमींना स्वतः रुग्णालयात केले दाखल, जखमींना मिळाले जीवनदान
marathinews24.com
बीड : (अनंत जाधव) – कर्तव्यदक्ष पोलीस अधीक्षक नवनीत काँवत हे छत्रपती संभाजीनगरहून बीडकडे जात असताना त्यांना अपघात झाल्याचे दिसून आले. त्यांनी तत्काळ वाहन थांबवून घटनास्थळी धाव घेत जखमींना मदत केली. परिस्थितीची गंभीरता लक्षात घेऊन त्यांनी स्वतःच्या वाहनातून जखमींना गेवराईत खासगी रुग्णालयात दाखल केले. वेळेवर उपचार मिळाल्याने जखमींची प्रकृती स्थिर आहे. सोलापूर धुळे राज्य महामार्ग गेवराई शहारा जवळ दि. १९ एप्रिलला मध्यरात्री दीड वाजण्याच्या सुमारास ट्रक आणि कार भीषण अपघात झाला होता. अपघातात कारमधील तिघे जण गंभीर जखमी झाले.
पुण्यात मू्ल्यांकन चाचणीची प्रश्नपत्रिका सोशल मीडियावर व्हायरल – सविस्तर बातमी
रात्रीची वेळ असल्याने जखमींना मदत करण्यासाठी कोणतेही वाहन थांबत नव्हते. एसपींच्या तत्पर आणि संवेदनशील कृतीचे सर्वत्र कौतुक होत आहे. अपघातात गणेश बाबूराव शेवाळे, त्यांची पत्नी शीतल शेवाळे आणि मुलगी प्रियदर्शिनी हे गंभीर जखमी झाले असून मुलगा साई किरकोळ जखमी झाला आहे. हे कुटुंब छत्रपती संभाजीनगरहून बीडकडे कारने (एमएच-१२ एसक्यू २९८९) प्रवास करत होते. दरम्यान, जळगावकडे जाणारा ट्रक (एमएच-२० ईजी ७६६६) विरुद्ध दिशेने येऊन कारला धडक दिली. घटनास्थळी उपविभागीय पोलिस अधिकारी अनिल कटके यांच्यासह इतर पोलिस कर्मचारीही दाखल झाले होते. जखमींना रुग्णालयात दाखल केल्यानंतर पोलिस अधीक्षक पुढील प्रवासासाठी बीडकडे रवाना झाले. पोलीस अधीक्षक नवनीत कॉवत यांच्या तत्परतेमुळे अपघातातील जखमींचे प्राण वाचले असून मानवतेचे दर्शन घडले आहे. त्यामुळे पोलीस अधिक्षक कॉवत यांचे सर्व स्तरातून कौतुक होत आहे.
