डेक्कन पोलीस ठाण्यात गुन्हा दाखल
marathinews24.com
पुणे – शहरातील एरंडवणे, वाघोली भागात चोरट्यांनी सदनिकेचे कुलूप तोडून ११ लाख रुपयांचा ऐवज चोरुन नेल्याची घटना उघडकीस आली. एरंडवणे भागातील उदय हाऊसिंग सोसायटीत भरदिवसा सदनिकेचे कुलूप तोडून चोरट्यांनी एक लाख ७० हजार रुपयांचे सोन्याचे दागिने लांबविले. याबाबत एका ज्येष्ठ नागरिकाने डेक्कन पोलीस ठाण्यात फिर्याद दिली आहे.
सतत अपमानित केल्याने हडपसरमध्ये तरुणाची आत्महत्या – सविस्तर बातमी
पोलिसांनी दिलेल्या माहितीनुसार, तक्रारदार आणि कुटुंबीय हे ६ जुलै रोजी सदनिका बंद करुन दुपारी पावणेदोनच्या सुमारास बाहेर पडले. चोरट्यांनी सदनिकेचे कुलूप तोडून आत प्रवेश केला. शयनगृहातील कपाट उचकटून एक लाख ७० हजार रुपयांचे सोन्याचे दागिने लांबविले. दुपारी साडेतीनच्या सुमारास घरफोडीचा प्रकार उघडकीस आला. याप्रकरणी चोरट्यांविरुद्ध गुन्हा दाखल करण्यात आला असून, पोलीस उपनिरीक्षक भोसले तपास करत आहेत.
वाघोली परिसरात भरदिवसा सदनिकेचे कुलूप तोडून चोरट्यांनी नऊ लाख ४५ हजार रुपयांचे दागिने लांबविल्याची घटना घडली. याबाबत व्यावसायिकाने वाघोली पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार हे लोहगाव-वाघोली रस्त्यावर राहायला आहेत. चोरट्यांनी ६ जुलै रोजी दुपारी पावणेचारच्या सुमारास सदनिकेचे कुलूप तोडले. शयनगृहातील कपाटातून चोरट्यांनी दागिने लांबविले. पोलीस उपनिरीक्षक देवगडे तपास करत आहेत.
