नऱ्हे पोलीस ठाण्यात गुन्हा दाखल
marathinews24.com
पुणे – नऱ्हे परिसरात नवीन घर खरेदी करण्यासाठी माहेरून पैसे आणण्याचा तगादा लावत विवाहित महिलेचा शारीरिक व मानसिक छळ केल्याची संतापजनक घटना समोर आली आहे. आरोपींनी विवाहितेला जबर मारहाण करत गॅसवर उकळत असलेली भाजीची गरम कढई तिच्या अंगावर फेकून मारली. याप्रकरणी पती कमलेश संपत शिंदे (वय ३९ वर्षे), सासू उषा संपत शिंदे (वय ५९ वर्षे), सासरे संपत भाऊ शिंदे (वय ६० वर्षे, सर्व रा. नऱ्हे, पुणे), पतीची बहीण मनिषा जगताप आणि मावसबहीण धनश्री महाडीक यांच्यावर नऱ्हे पोलिस ठाण्यात गुन्हा दाखल करण्यात आला आहे. याबाबत विवाहित फिर्यादी महिला (वय ३८ वर्षे, रा. नऱ्हे, पुणे) यांनी फिर्याद दिली आहे.
दागिने लंपास करणाऱ्या मोलकरणीला बेड्या; हडपसर पोलिसांची कारवाई – सविस्तर बातमी
पोलिसांनी दिलेल्या माहितीनुसार, हा छळ दि. २४ मे ते दि. २८ जून या कालावधीत घडला. आरोपींनी फिर्यादी विवाहितेला नवीन घर घेण्यासाठी माहेरून वडिलांकडून पैसे घेऊन येण्यासाठी आणि लग्नात दिलेले दागिने विकून नवीन फ्लॅट घेण्यासाठी तगादा लावला. विवाहितेने दागिने देण्यास नकार दिला असता आरोपींनी संगनमत करून तिला मानसिक व शारीरिक त्रास देण्यास सुरुवात केली. तिला अमानुष मारझोड करून तिचे दागिने स्वतःजवळ ठेवून त्याचा अपहार केला. इतकेच नव्हे तर आरोपींनी विवाहितेवर रागाच्या भरात स्टीलचा ग्लास फेकून मारला आणि गॅसवर शिजत टाकलेली भाजीची कढई विवाहितेच्या अंगावर फेकून मारली. नऱ्हे पोलीस या प्रकरणाचा तपास करत आहेत.
