समाजहितातील कार्याची दखल घेत महासंघाचा सन्मान
marathinews24.com
नांदेड – आदिवासी मन्नेरवारलु समाजाच्या सामाजिक, शैक्षणिक, आर्थिक, सांस्कृतिक व संवैधानिक हक्कांच्या संरक्षणासाठी कार्यरत असलेल्या आदिवासी मन्नेरवारलु महासंघाने माजी जिल्हा परिषद सदस्य गंगाधर यादवराव तोटलोड यांची धर्माबाद तालुकाध्यक्ष म्हणून नियुक्ती केली आहे.
कोयना धरण “छत्रपती शिवाजी महाराज कोयना जलसागर’ नावाने ओळखले जाणार – सविस्तर बातमी
महासंघाचे राष्ट्रीय अध्यक्ष प्रवीण (अण्णा) जेठेवाड यांनी नियुक्तीपत्र प्रदान करून सत्कार केले. या वेळेस संघटनातील अनेक पदाधिकारी उपस्थित होते. आज पर्यंत समाजहितासाठी केलेले निःस्वार्थ कार्य, समाजाप्रती असलेली बांधिलकी आणि संघटन कौशल्याची दखल घेत ही नियुक्ती करण्यात आल्याचे नियुक्तीपत्रात नमूद करण्यात आले आहे.
समाजातील गोरगरीब, वंचित आणि गरजू नागरिकांच्या मदतीसाठी नेहमी तत्पर असणारे, प्रत्येक समाजाच्या व्यक्तीला आपल्या कुटुंबातील सदस्याप्रमाणे जपणारे, विश्वास, आपुलकी, मैत्री भाव यांचा सुंदर संगम असलेले गंगाधर तोटलोड हे जनसामान्यांच्या सुख-दुःखात सदैव सहभागी होत विकासकामांद्वारे समाजहित जपण्याचे कार्य करत आहेत. त्यांच्या या समाजाभिमुख कार्याची दखल घेत महासंघाने त्यांच्यावर ही महत्त्वाची जबाबदारी सोपविली आहे.
या नियुक्तीमुळे धर्माबाद तालुक्यात आदिवासी मन्नेरवारलु समाजाचे संघटन अधिक बळकट होईल, समाजातील कष्टकरी कामगार वर्ग, युवक, महिला, विद्यार्थी, शेतकरी व सर्वसामान्य घटकांसाठी अधिक प्रभावीपणे कार्य करता येईल, असा विश्वास समाजबांधवांनी व्यक्त केला आहे. तसेच यांच्या नेतृत्वाखाली येणाऱ्या काळात समाज निश्चितच प्रगतीच्या दिशेने वाटचाल करेल, असे मत ओमप्रकाश आदमवाड यांनी मांडले.
या नियुक्तीबद्दल विविध सामाजिक, राजकीय आणि शैक्षणिक क्षेत्रातील मान्यवरांकडून तोटलोड यांचे अभिनंदन करण्यात येत आहे.
