९५ हजारांचा विदेशी दारूसाठा जप्त
marathinews24.com
पुणे – ‘मिशन क्रॅकडाऊन’अंतर्गत परिमंडळ सातच्या हद्दीत बेकायदेशीर दारू विक्रीविरुद्ध कारवाई करण्यात आली. लोणीकंद पोलिसांनी फुलगावमधील हॉटेल जगदंबवर छापा टाकून विदेशी मद्य व बिअरचा ९५ हजार ८६० रुपयांचा साठा जप्त केला. याप्रकरणी राहुल सुरेश संदनशिव (३६, रा. फुलगाव, ता. हवेली) याच्याविरोधात गुन्हा दाखल केला.
पुण्यात एमडी तस्करीच्या तयारीतील दोघांना अटक – सविस्तर बातमी
स्थानिक पोलिसांच्या नेतृत्वाखाली ‘मिशन क्रॅकडाऊन’ मोहीम सुरू आहे. या मोहिमेअंतर्गत बुधवारी (दि. १९) सायंकाळी साडेचारच्या सुमारास फुलगाव येथील हॉटेल जगदंब येथे कारवाई करण्यात आली. हॉटेलमध्ये विनापरवाना व बेकायदेशीररीत्या देशी-विदेशी दारूची विक्री करण्याच्या उद्देशाने दारूसाठा करून ठेवल्याचे पोलिसांच्या निदर्शनास आले. त्यानंतर पोलिसांनी विविध ब्रँडच्या दारूच्या बाटल्या जप्त केल्या. जप्त मुद्देमालाची एकूण किंमत ९५ हजार ८६० रुपये असल्याचे पोलिसांनी सांगितले.
जप्त केलेला मुद्देमाल पुढील कायदेशीर कारवाईसाठी लोणीकंद पोलिसांच्या ताब्यात देण्यात आला असून, पुढील तपास सुरू आहे.
ही कारवाई सहायक पोलिस निरीक्षक गोरक्षनाथ खरड, पोलिस उपनिरीक्षक नितीन राठोड, पोलिस हवालदार सुशील बेंद्रे, विलास केदारी, गणेश इथापे, हरीप्रसाद पुंडे, शुभम चिनके, अमोल सरतापे आणि लालू कन्हे यांच्या पथकाने केली.
