तिघांविरुद्ध गुन्हा दाखल
marathinews24.com
पुणे – महाविद्यालयातील डिझायनिंग अभ्यासक्रमास प्रवेश मिळवून देण्याच्या आमिषाने ७० विद्यार्थ्यांची फसवणूक करण्यात आल्याचा प्रकार उघडकीस आला आहे. याप्रकरणी विश्रामबाग पोलिसांनी संबंधित महाविद्यालयाच्या व्यवस्थापन समितीतील एकासह तिघांविरुद्ध गु्न्हा दाखल केला आहे.
सफाई कर्मचाऱ्याच्या डोक्यात कठीण वस्तू घालून खून – सविस्तर बातमी
याप्रकरणी संबंधित महाविद्यालयाच्या व्यवस्थापन समितीतील एकासह प्रथमेश अशोक राऊत (वय २६), प्रतिक्षा अशोक राऊत (वय २८, रा. पुनावळे) यांच्याविरुद्ध गुन्हा दाखल करण्यात आला आहे. याबाबत एकाने विश्रामबाग पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, शनिवारवाडा परिसरात फ्लोरिट काॅलेज ऑफ डिझायनिंग ही शैक्षणिक संस्था आहे. फिर्यादी मूळचे छत्रपती संभाजीनगरचे रहिवासी आहेत. त्यांच्या मुलीला डिझायनिंग अभ्यासक्रमास प्रवेश घ्यायचा होता. फिर्यादीसह ७० विद्यार्थ्यांच्या पालकांकडून अभ्यासक्रमास प्रवेश मिळवून देण्याच्या आमिषाने आरोपींनी शुल्क घेतले. हे शुल्क महाविद्यालयाच्या बँक खात्यात जमा केले. हे शुल्क एका महिला आरोपीच्या खात्यात जमा करण्यात आले. फिर्यादीने त्यांच्याकडे शुल्क जमा केल्याची पावती मागितली. तेव्हा आरोपींनी महाविद्यालयाच्या नावे शुल्क भरल्याबाबतची बनावट पावती दिली. फसवणूक झाल्याचे उघडकीस आल्यानंतर फिर्यादीने नुकतीच पोलिसांकडे तक्रार दिली. पोलीस उपनिरीक्षक सत्यवान गेंड तपास करत आहेत.
