मंडळांनी नियमांचे पालन करुन गणेशोत्सव शिस्तबद्धपणे उत्साहात साजरा करावा
marathinews24.com
पुणे – ‘गणेश मंडळांच्या पाठीशी पोलीस आहेत. मंडळांनी नियमांचे पालन करुन गणेशोत्सव शिस्तबद्धपणे उत्साहात साजरा करावा’, असे आवाहन पोलीस आयुक्त अमितेश कुमार यांनी शुक्रवारी केले. पुणे पोलीस आणि विघ्नहर्ता न्यासाकडून आदर्श गणेशोत्सव स्पर्धा २०२४ चे आयोजन करण्यात आले होते. या स्पर्धेचा पारितोषिक वितरण सोहळा शिवाजीनगर पोलीस मुख्यालयात पार पडला. या वेळी पोलीस आयुक्त अमितेश कुमार बोलत होते.
अँड. प्रकाश आंबेडकर यांचा भव्य नागरी सत्कार होणार – सविस्तर बातमी
स्पर्धेत विजेत्या ठरलेल्या मंडळांना पोलीस आयुक्त अमितेशकुमार यांच्या हस्ते पुरस्कार प्रदान करण्यात आले. सहपोलीस आयुक्त रंजनकुमार शर्मा, विघ्नहर्ता न्यासचे विश्वस्त, ज्येष्ठ पत्रकार राजीव साबडे, डाॅ. मिलिंद भोई, उदय जगताप, अतिरिक्त पोलीस आयुक्त राजेश बनसोडे, मनोज पाटील, गुन्हे शाखेचे अतिरिक्त आयुक्त पंकज देशमुख, पोलीस उपायुक्त ऋषीकेश रावले, मिलिंद माेहिते, संभाजी कदम, सोमय मुंडे, डाॅ. राजकुमार शिंदे, वाहतूक शाखेचे उपायुक्त हिंमत जाधव या वेळी उपस्थित होते.
‘विसर्जन मिरवणुकीतील सहभागावरून सुरू असलेला वाद मिटला आहे. मंडळांच्या पदाधिकाऱ्यांशी संवाद साधून समन्वयाचा मार्ग काढण्यात आला आहे. गणेशोत्सवाला राज्यउत्सवाचा दर्जा देण्यात आला आहे. मंडळांना काही अडचण जाणवित असल्यास त्यांनी पोलिसांशी संपर्क साधवा. मंडळांना विविध प्रकारच्या परवानगी एकाच ठिकाणी मिळणार आहे. मंडळांच्या पाठीशी पोलीस आहेत. नियमांचे पालन करुन उत्सव शिस्तबद्धपणे साजरा करावा’, असे आवाहन पोलीस आयुक्त अमितेश कुमार यांनी केले.
‘उत्सवाच्या काळात परगाावाहून मोठ्या संख्येने भाविक येतात. भाविकांचे सुरक्षा विचारात घेऊन बंदोबस्ताची आखणी करण्यात आली. मंडळांनी मंडपाच्या परिसरात सीसीटीव्ही कॅमेरे बसवावेत. हे कॅमेरे मुख्य नियंत्रण कक्षाशी जोडण्यात येणार आहे. त्यादृष्ठीने पोलीस ठाण्याच्या अधिकाऱ्यांना सूचना देण्यात आल्या आहेत. मंडळांकडून विविध समाजोपयोगी उपक्रम राबविण्यात येत आहेत. वर्षभर विविध उपक्रम राबविणारे मंडळ आणि पदाधिकरी कौतुकास पात्र आहेत,’ असे त्यांनी नमूद केले. पोलीस उपायुक्त ऋषीकेश रावले यांनी प्रास्ताविक केले. उपायु्क्त हिंमत जाधव यांनी आभार प्रदर्शन केले.
