वारजे पोलिसांची कारवाई
marathinews24.com
पुणे – ‘गे डेटिंग ॲप’वरील ओळखीतून तरुणाशी मैत्री करुन त्याला लुटणाऱ्या चोरट्यांना वारजे पोलिसांनी अटक केली. या प्रकरणी एका अल्पवयीनाला ताब्यात घेण्यात आले. ओम गणेश वाघमारे (वय २०), गणेश उत्तम माने (वय २७, दोघे रा. वारजे माळवाडी), जगदीश रामू पवार (वय २३, रा. शिवणे) अशी अटक करण्यात आलेल्यांची नावे आहेत. याबाबत एका तरुणाने वारजे माळवाडी पोलीस ठाण्यात फिर्याद दिली आहे.
राष्ट्रवादी काँग्रेसचे प्रवक्ते विकास लवांडे यांच्यावर शाईफेक – सविस्तर बातमी
पोलिसांनी दिलेल्या माहितीनुसार, तक्रादार २५ वर्षीय तरुण कर्वेनगर भागात राहायला आहे. त्याची एका अल्पवयीनाशी ‘गे डेटिंग ॲप’वरुन ओळख झाली. अल्पवयीनाने त्याला जाळ्यात ओढून कर्वेनगर भागात भेटण्यासाठी बोलाविले. तेथून त्याला दुचाकीवरुन निर्जन ठिकाणी नेले. अल्पवयीनाने तेथे साथीदारांना बोलावून घेतले. अल्पवयीनाबरोबर असलेल्या साथीदारांनी तरुणाला धमकावून त्याच्याकडून ऑनलाइन पद्धतीने ८ हजार ६०० रुपये घेतले. तरुणाच्या गळ्यातील चांदीची साखळी हिसकावून नेली. त्यानंतर घाबरलेल्या तरुणाने पोलीस ठाण्यात धाव घेऊन तक्रा दिली. वरिष्ठ पोलीस निरीक्षक महेश बोळकोटगी यांच्या मार्गदर्शनाखाली पथकाने तांत्रिक तपास करुन आरोपींना ताब्यात घेतले. पोलीस उपनिरीक्षक शंकर पाटील तपास करत आहेत.
