सायबर चोरट्यांविरुद्ध चतु:शृंगी पोलीस ठाण्यात गुन्हा दाखल
marathinews24.com
पुणे – गॅस पुरवठा खंडीत करण्याची भीती दाखवून सायबर चोरट्यांनी एकाच्या बँक खात्यातून ३ लाख ८० हजारांची रोकड लांबविल्याची घटना उघडकीस आली. याप्रकरणी सायबर चोरट्यांविरुद्ध चतु:शृंगी पोलीस ठाण्यात गुन्हा दाखल करण्यात आला आहे. याबाबत एकाने चतु:शृंगी पोलीस ठाण्यात फिर्याद दिली आहे. ४८ वर्षीय तक्रारदार हे ओैंधमधील डीपी रस्त्यावरील एका सोसायटीत राहायला आहेत.
तरुणाला विवस्त्र करुन मारहाण – सविस्तर बातमी
सायबर चोरट्यांनी त्यांच्या मोबाइल क्रमांकावर काही दिवसांपूर्वी संपर्क साधला होता. खासगी गॅस पुरवठा करणाऱ्या कंपनीतून बोलत असल्याची बतावणी केली. थकित देयक न भरल्यास गॅस पुरवठा तातडीने खंडीत करण्यात येईल, अशी भीती चोरट्यांनी त्यांना दाखविली. त्यानंतर चोरट्यांनी त्यांच्या बँक खात्याची माहिती घेतली. या माहितीचा गैरवापर करुन चोरट्यांनी बँक खात्यातून तीन लाख ८० हजार रुपये लांबविले. गुन्हे शाखेच्या पोलीस निरीक्षक अश्विनी ननावरे तपास करत आहेत. गॅस पुरवठा, वीज पुरवठा खंडीत करण्याची भीती दाखवून फसवणूक करण्याच्या घटना शहरात वाढीस लागल्या आहेत. नागरिकांनी चोरट्यांच्या बतावणीकडे दुर्लक्ष करावे. खातरजमा करुन देयक भरणा करण्याबाबतचे व्यवहार करावेत, असे आवाहन करण्यात आले आहे.
