तब्बल ४१ लाखांचा घातला गंडा
marathinews24.com
पुणे – फेसबुकद्वारे कर्ज मिळवून देण्याची बतावणी करीत सायबर चोरट्याने तरूणाचा विश्वास संपादित केला. त्यानंतर त्याला लिंक डाउनलोड करण्यास भाग पाडले. तरूणाचे फोटो मॉर्फ करून धमकी देत, सायबर चोरट्यांनी त्याला तब्बल ४१ लाख २० हजारांचा गंडा घातला आहे. ही घटना ५ जून ते ३ नोव्हेंबर २०२५ कालावधीत भवानी पेठेत घडली आहे. याप्रकरणी २८ वर्षीय तरूणाने समर्थ पोलीस ठाण्यात फिर्याद दाखल केली आहे.
पार्टटाईम जॉबच्या नावाखाली २४ लाखांचा गंडा – सविस्तर बातमी
पोलिसांनी दिलेल्या माहितीनुसार, तक्रारदार तरूण भवानी पेठेत राहायला असून, ५ जूनला सायबर चोरट्यांनी त्यांच्याशी संपर्क साधला होता. सायबर चोरट्यांनी तरूणाला फेसबुकद्वारे कर्ज मिळवून देण्याचे आमिष दाखवले. त्यानंतर त्याला लिंक पाठवून डाउनलोड करण्यास भाग पाडले. त्यानंतर काही दिवसांनी सायबर चोरट्यांनी तरूणाचा फोटो मॉर्फ करीत धमकी दिली. अवघ्या पाच महिन्यांत तब्बल ४१ लाख २० हजार रूपये ऑनलाईनरित्या वर्ग करून घेत फसवणूक केली आहे. याप्रकरणी वरिष्ठ पोलीस निरीक्षक उमेश गित्ते तपास करीत आहेत.
तरूणाला २३ लाख ७० हजारांचा गंडा
जादा परताव्याचे आमिष दाखवून सायबर चोरट्यांनी तरूणाला लिंक पाठवून डाउनलोड करण्यास भाग पाडले. याप्रकरणी सायबर चोरट्यांनी तरूणाला तब्बल २३ लाख ७० हजारांचा ऑनलाईन गंडा घातला आहे. ही घटना १५ मार्च ते २२ जुलै २०२५ कालावधीत भवानी पेठेत घडली आहे. याप्रकरणी ३७ वर्षीय तरूणाने समर्थ पोलीस ठाण्यात फिर्याद दाखल केली आहे. त्यानुसार मोबाइलधारकासह बँकखातेधारकाविरूद्ध गुन्हा दाखल केला आहे. याप्रकरणी पोलीस निरीक्षक चेतन मोरे तपास करीत आहेत.
