हडपसर भागात कारवाई
marathinews24.com
पुणे – मसाज पार्लरच्या नावाखली सुरू असलेल्या वेश्या व्यवसायाचा प्रकार गुन्हे शाखेने उघडकीस आणला. पोलिसांनी हडपसर भागात मसाज पार्लरवर छापा टाकून व्यवस्थापकाला अटक केली. कारवाईत तीन तरुणींना ताब्यात घेण्यात आले आहे. सौरभ शामराव इंगळे (वय २८, रा. लक्ष्मीमाता मंदिराजवळ, काळेपडळ, हडपसर) असे अटक करण्यात आलेल्याचे नाव आहे.
परप्रांतीय कामगाराचा कोरेगाव भीमा परिसरात खून – सविस्तर बातमी
हडपसरमधील गाडीतळ परिसरात असलेल्या एका इमारतीत व्हाईट पर्ल स्पा या मसाज पार्लरमध्ये वेश्याव्यवसाय सुरू असल्याची माहिती गु्न्हे शाखेच्या अनैतिक मानवी वाहतूक आणि व्यापार प्रतिबंध कक्षाला मिळाली. त्यानंतर पोलिसांच्या पथकाने बनावट ग्राहकाच्या माध्यमातून खातरजममा केली. त्यानंतर पोलिसांच्या पथकाने तेथे छापा टाकला. मसाज पार्लरचा व्यवस्थापक इंगळे याने तरुणींना पैशांचे आमिष दाखवून त्यांना वेश्या व्यवसायास प्रवृत्त केल्याची माहिती मिळाली. त्यानंतर त्याला अटक करण्यात आली. मसाज पार्लरमधून तीन तरुणींना ताब्यात घेण्यात आले.
गुन्हे शाखेचे अतिरिक्त पोलीस आयुक्त पंकज देशमुख, उपायुक्त निखील पिंगळे, सहायक आयुक्त शंकर खटके यांच्या मार्गदर्शनाखाली पाेलीस निरीक्षक छगन कापसे, उपनिरीक्षक विशाल चव्हाण, तुषार भिवरकर, दताराम जाधव, बबनराव केदार, इम्रान नदाफ, रेश्मा कंक, भुजबळ यांनी ही कारवाई केली.
